«Brazaletes de esperanza» na Costa da Morte polo Día contra o Cancro
CARBALLO
Hoxe é a xornada mundial desta enfermidade, e na comarca o deporte hase implicado coa causa
04 feb 2024 . Actualizado ás 05:00 h.«Os domingos hai moitos actos deportivos, e por iso a campaña este ano, xa que o día cae en domingo, tira un pouco cara aí», explica Julia Blanco , presidenta da xunta local cabanesa da Asociación Española contra o Cancro (AECC). Refírese á conmemoración do Día Mundial contra o Cancro, que é hoxe, 4 de febreiro. As distintas iniciativas na comarca encamíñanse cara á visibilización, á que se suman sobre campos e pistas deportistas de distintas disciplinas. «Os xogadores e xogadoras levarán brazaletes en sinal de apoio ás persoas con cancro e ás súas familias, tamén á investigación», reseña Blanco . Así o farán os veteranos do Nantón no seu choque contra o Sporting Bértoa (10.30) e os do Ponteceso contra o Soneira (10.00, O Pinguel). Tamén o equipo sénior do Cabana, no campo das Redondas (16.30), encontro no que se enfrontará ao Castriz. En Cabana iluminouse ademais o consistorio de verde e colgouse, por vez primeira, unha gran pancarta conmemorativa.
Nos encontros deportivos ofrecerase así mesmo información desde a xunta local, que foi o que fixo a de Carballo no partido —baloncesto— que enfrontou onte ao Artai Sénior Feminino e o Universitario Campus Ourense. Implicouse así mesmo coa causa o Basket Xiria, ou o Calvo Xiria de balonmán, en Primeira Nacional, este sábado desprazado ao pavillón Pablo Herbello de Bueu . A xunta local carballesa, presidida por Ana Casais, ha ir crecendo en socios nos últimos anos, tamén en aceptación das distintas iniciativas, véxase a implicación nas andainas, por exemplo. Como en Cabana, o consistorio iluminouse de verde. Actividades varias promoveron na outra punta da comarca, Fisterra, cunha charla, peditorios ou, igualmente, deporte. En dous encontros lucirán hoxe os xogadores estes simbólicos brazaletes verdes: o Fisterra-Camariñas feminino, ás 12.00 horas, e o Fisterra-Dumbría masculino, ás 17.00. Tamén os levará o Paiosaco, que se medirá ás 17.00, no campo da Porta Santas, ao Estradense.
Brazaletes de esperanza, nome da campaña solidaria, une deportes, equipos e afeccións «en algo que toda a sociedade desexa alcanzar: a supervivencia ao cancro», publicou a xunta provincial da AECC. O obxectivo desta supervivencia está no 70 %, como mínimo, para o ano 2030. Varios equipos de fútbol de Malpica tamén se sumarán hoxe á causa.