Comerse o entroido sen baleirar o peto é posible nun bo puñado de locais. Aquí tes cinco, e a partir de 11 euros
03 feb 2024 . Actualizado ás 23:14 h.Unha inocente pregunta en redes —«onde che gusta comer o cocido a ti?»— abriu un pequeno melón sobre as bondades gastronómicas de Galicia. Hóuboos de interior que limitaron a costa a peixe e marisco, e hóuboos de costa que replicaron con sorna que nas leiras do finis terrae, obviamente, só se plantan sardiñas. Con retranca e seguramente bo criterio outros replicaron que o mellor cocido é o da súa casa, pero o certo é que a Costa da Morte ten verdadeiros templos culinarios nesta materia, e para petos variados. Hai locais que ata o ofrecen no menú do día, unha forma económica de comerse o entroido, por unha banda, e unha forma de gozalo sen ser baixo reserva, en grupos ou en enchentes de entidades varias, por outra. Para mostra, aquí, cinco deles.
Hai algo máis dun ano que Eva Gundín púxose a cargo de Casa Mosqueira, en Ponteceso , e está polo momento moi contenta. Viven agora a tempada alta do cocido, con mesas baixo pedido, pero elixiron os xoves para ofrecelo no menú da diario. Por 11,50 euros, o mesmo que custa calquera outra xornada, un pode saborear o prato con todos os seus complementos, carne que por certo salgan eles mesmos. Por 11 euros entre semana e por 14 euros en domingo pódese comer en casa Valentín (A Pereiriña, Cee). Salvo o sábado, que pecha, ofréceno todos os días do ano, verán incluído, cando ten especial demanda para turistas que queren probar sabores autóctonos. Non só tira para os de fóra, tamén para os deica que non queren, ou que non poden, embarcarse nunha preparación que require de organización, tempo de «chup chup» e o seu bo diñeiro.
«Unha loucura»
Eva Gundín nota ben en casa Mosqueira os xoves, como tira o cocido: «Unha loucura». Na Pedra Furada, Carballo, fano talvez aínda máis emocionante, porque non teñen un día fixo á semana para incorporalo no menú diario, aínda que adoitan rotar entre mércores e xoves. Directamente chámanlles para preguntarlles por el, indica Carolina Santos. Aquí cómese por 14 euros, co seu primeiro de sopa de fideos, o seu segundo con nabizas e carne e a súa sobremesa. Carne, matiza, de porco: pata, chourizo, cachucha, lacón, costela e touciño entrefebrado. Non quedan lonxe os dous decenios probando esta fórmula e dálles bos resultados, así que, salvo no verán, «que non hai tirada», pona en práctica: «Canta máis cantidade se fai máis rico está».
Doce euros é o que custa o menú do día no emblemático Mesón do Polbo de Carballo, onde tampouco teñen día fixo á semana para incorporar o cocido a el. Depende en gran medida dos ingredientes: «Sobre todo a verdura é o que marca a pauta este ano», contaba onte Carlos Brión. Teñen tamén a opción de carta, pero a do menú do día leva anos funcionando, e mesmo no verán tamén.
Non un, senón dous días á semana, ofréceo por exemplo A Pedra, de Nantón (Cabana). O martes, de repolo e o xoves, de nabizas, para que se poida elixir ao gusto de cada cal. Son 11 euros os que se han de abonar neste local, que ofrece a elixir catro primeiros e catro segundos, co cocido incluído neles. Convence a proposta? «Nós temos o bar cheo», confirman. E, xa que logo, iso é que si.