O PP e o BNG repiten candidatos para o Parlamento galego na Costa da Morte
CARBALLO
Hai máis renovación no PSOE, con dous rostros da comarca nos postos de saída
15 ene 2024 . Actualizado ás 13:00 h.O carballés Rubén Lorenzo, a muxiana Sandra Vilela e a camariñá Paula Mouzo concorrerán de novo nas listas do Partido Popular para eleccións do próximo 18 de febreiro. Tamén o carballés Daniel Pérez e o corcubionés Óscar Insua (por primeira vez en postos de saída, aínda que xa ocupara outros máis abaixo) formarán parte da candidatura do BNG aos comicios autonómicos previstos para o próximo mes. Daniel Pérez, edil de Deportes na capital bergantiñá, ocupará o posto número cinco, e o tamén avogado corcubionés Óscar Insua, o número sete, cifra que fai catro anos deu acceso á Cámara do Hórreo. No 10 ía o ceense Serxio Domínguez.
En canto ao PSOE, elixiu a unha carballesa como cabeza de lista pola Coruña, Patricia Iglesias , mentres que o concelleiro de Deportes de Camariñas, Fabián Canosa Pasantes, vai colocado no número 6.
Actualmente, ocupan cadeira de brazos no Parlamento do Hórreo, Rubén Lorenzo, Sandra Vilela e Paula Mouzo, polo Partido Popular, mentres que Daniel Pérez é deputado nacionalista, en tanto que o PSOE da zona está representado pola cercedense Begoña Rodríguez Rumbo, unha veterana na corte autonómica. Begoña Rodríguez non concorre neste caso en postos de saída despois de varias lexislaturas presente no Hórreo. Tamén foi edila no Concello de Cerceda.