A sociedade ambiental acaba de licitar a súa subministración por case 240.000 euros
28 nov 2023 . Actualizado á 05:00 h.A Sociedade Galega do Medio Ambiente (Sogama) acaba de licitar, por case 240.000 euros, a subministración, almacenamento e distribución de 3.000 novos composteiros. Con eles, a súa rede de compostaxe doméstica superará as 24.000 unidades, en tanto que Sogama xa repartiu, de forma gratuíta, máis de 21.100 composteiros entre 458 entidades: 225 concellos, 201 centros educativos e 32 colectivos sociais. O obxectivo último, promover a reciclaxe de materia orgánica en orixe e avanzar cara a un modelo de economía circular. Facilítase a obtención dun abono natural de alta calidade que poida ser aplicado en agricultura e xardinería con todas as garantías. Para que iso así sexa, ademais da repartición de composteiros, a sociedade tamén realiza cursos formativos para facilitarlles aos participantes técnica e asesoramento en localización, control de parámetros ou «refugallos» adecuados e non adecuados.