Rueiros dá Vila en Caión, Punto Rojo en Baio, Festa Mariñeira en Malpica, teatro en Cee e máis...¡anota!
20 ago 2023 . Actualizado ás 05:00 h.O verán segue avanzando a ritmo festivo na Costa da Morte. Domingo 20 de agosto e un bo puñado de propostas para pasar esta velada na comarca. Anota as principais propostas, ¡e goza!
Cara ao sol polos Rueiros de Caión
Hoxe Vento e choiva xogaron malas pasadas a varias propostas culturais na tarde do venres. Houbo que pórse a cuberto en Carballo ou en Caión, localidade esta última onde arrincaba a terceira edición do programa cultural Rueiros dá Vila. Toco gorecerse no centro sociocomunitario, aínda que as cousas non son como empezan, senón como avanzan, e por fortuna onte amenceu un deses días «azul Caión». Permitiu sacar á rúa os Rueiros de «verdade», os que toman escenarios ao aire libre. A proposta, organizada polo Concello larachés e xestionada pola empresa Sincro, segue hoxe adiante, coa terceira xornada. Ás 19.30, no escenario Cárcere Vello, sesión familiar a cargo do Mago Paco. A esa mesma hora, pero no Rueiro dás Figueiras (miradoiro cara ao porto) intervirá o dúo arteixán Camándula: son violín e acordeón e terán ademais unha invitada moi especial, a vimiancesa Irma Macías, voz de Luar na Lubre. Finalmente, no Escenario Patio —leira ao lado da igrexa—, pecharán a velada Cantometrics (21.30), banda con vínculo local: traen clásico, tradicional, pop, folk... Todos os concertos son gratuítos, e de acceso libre.
Última chamada do Punto Rojo baiés
Que o sol saíse permitiu onte en Baio que os comercios participantes nunha nova edición da campaña Punto Rojo sacasen os seus mercadillos á rúa. Xa desde primeira hora houbo bastante movemento, unha animación que en horario de comida se trasladou aos locais de hostalería que ofrecen tapas ou pratos especiais por esta iniciativa que seguirá tamén hoxe, domingo. De feito, e tendo en conta que mesmo pese ao mal tempo o venres non foi do todo malo, as expectativas para esta terceira xornada son moi boas, pois coincide con feira: é terceiro domingo de mes e, xa que logo, «domingo de Baio». Teñen todos os locais identificados co correspondente Punto Rojo , polo que non hai perda para sumarse a gozar de «rebaixas rebaixadas», de artesanía e de animación varia. Os nenos terá inchables e actividades de 11.00 a 13.00 e de 16.00 a 20.00. Yosi Fervenza seguirá coa súa talla a motosierra mañá e tarde, na praza Jorge Mira. O tren turístico funcionará de 11.30 a 15.00 e de 17.00 a 19.00, e finalmente da música encargaranse Galeop (13.00 horas) e a Rapacollóns Big Band (17.30). ¡E non se esqueza de que hai opción de levar premio!
Malpica, música e feira con identidade
Que Malpica ten un dos veráns máis festeiros da Costa da Morte é unha idea asentada. Moitos xa teñen posta a mirada nas Festas do Mar, para a próxima semana, pero non poucos tampouco gozan este «finde» da dobre proposta impulsada pola área de Turismo na localidade. Por unha banda, a FeiraMariñeira , que arrincou en xoves e xa esa noite tivo boa animación. Se non se pasou, está a tempo hoxe, porque será o último día: a partir das 11.00 horas, artesanía e alimentación variada, pero tamén pasacalles musicais (12.00, 14.00, 20.00 e 22.00) ou contacontos (13.00). Entre as 14.30 e as 17.00, pausa para xantar. Non lle faltan opcións aos nenos.
A segunda das propostas rematou onte, e era a FestaGalega . Por ela pasaron o venres voces como a da gran Uxía: «Coa miña súper banda, imos á fermosa Malpica a disfrutar dunha festa galega 100%. Temos propostas musicais de luxo e aquí estarán algunhas delas», invitaba ela en horas previas. Big Band Atlantic, Carcaxía, Do Rivés, Vos d'Abaixo e De Ninghures completaron as xornadas.
Teatro, visitas e algunha festa máis
Punto Rojo en Baio, Rueiros dá Vila en Caión ou Feira Mariñeira de Malpica son algunhas das propostas destacadas para este domingo na Costa da Morte, pero en realidade non menos estas que seguen:
Cee • Teatro • Avanza a Semana do Teatro e dás Artes Escénicas do Concello de Cee, Á esCEEna!. Hoxe, segunda cita, de novo ás 21.30 no auditorio Baldomero Cores, con entrada a 7 euros (5 se se ten dereito a bonificación; tamén existe a posibilidade de bonos). Os espectadores poderán ver Parasimpáticas: ou galego é un estado mental, a nova obra de dúas cómicas galegas, Lucía Veiga e Marita Martínez. Produce Ainé. «Dúas neuronas organizan unha xunta extraordinaria neuronal para analizar o estado da materia gris galaica e estimular novas conexións galaico simpáticas. Cada punto da orde do día levará ás neuronas asistentes a percorrer lugares comúns do consciente colectivo, no que a versión galega sempre é moito mellor»: por aquí vai a proposta. Engaden, como reza o título, que «ser galego é un estado mental». Función para maiores de trece anos.
Dolmen Dombate • Visitas guiadas • Como cada día, de 11.00 a 14.00 e de 16.00 a 20.00. Sen custo algún.
Castelo de Vimianzo e Torres do Allo (Zas) • Visitas teatralizadas • En ambos os puntos, a cargo dos Quinquilláns. No castelo vimiancés, ás 12.30 e 17.00. Nas Torres, ás 19.00. Con acceso gratuíto.
Laxe • Obradoiro • Mar de fábula imparte na localidade o taller Pegadas de Man, dentro do proxecto Man, Arte e Naufraxios. Iniciativa de promoción artística e cultural para alumnado de primaria, na que se elaborarán obxectos con crebas de mar: de 10.30 a 13.30 no local social Valle-Inclán e a praia. Prazas limitadas, e con inscrición.
Ponteceso • San Bernaldo dá Graña • Hoxe, pasacalles coa banda Inllar, misa ás 13.00 e vermú e verbena coa orquestra Principal.