Premios para Tuéjele Teatro e Farándula Velutina, do instituto Fernando Blanco ceense
CARBALLO
O grupo do IES logrou o premio ao mellor elenco nos Buero de Teatro Novo, mentres que Farándula Velutina fixo o propio no apartado de mellor creación escénica
19 jun 2020 . Actualizado ás 23:59 h.O equipo directivo do instituto Fernando Blanco de Cee vén de dar a coñecer unha feliz noticia para o seu centro. O grupo de teatro do IES, Tuéjele Teatro, logrou o premio ao mellor elenco na 17.ª edición dos galardóns Buero de Teatro Novo: conseguiuno pola función A estraña parella, unha adaptación da obra homónima de Neil Simon. Doutro lado, Farándula Velutina, agrupación teatral integrada por antigos membros de Tuéjele Teatro, fíxose co premio á mellor creación escénica con temática social, polas obras Papiroflexia e Animais de compañía, as dúas de Fernando Castro Pardes, que é profesor no propio instituto.
Novidades positivas, pois, para a cultura da Costa da Morte e para a creación ao redor dos centros escolares, moi extensa particularmente en Cee.