O carnaval pontecesán celebra 25 anos, un cuarto de século, cun programa «de récords»
CARBALLO
ENTROIDOS | Máis premios, máis animación e máis filloas ca nunca: 15.000 unidades se podrán degustar o domingo 3 de marzo. Corcubion, Vimianzo ou Malpica tamén van dando pinceladas das súas festas
15 feb 2019 . Actualizado ás 23:32 h.O Concello de Ponteceso tamén deu a coñecer a programación do seu entroido, que como vén sendo tradicional terá un epicentro na propia capital municipal e outro en Corme. Cumpre a celebración un cuarto de século, 25 anos, de aí que se apostasen por unha serie de «récords»: máis premios, máis animación e máis filloas ca nunca, din. Serán nada menos ca 15.000 as unidades que se poderán degustar o domingo 3 de marzo, a partir das 19.00 horas, no pavillón municipal. Isto chegará despois do tradicional desfile de disfraces, que como está ocorrendo con outros, gaña cada vez máis sona fóra da Costa da Morte. Xogos, inchables e música completarán a cita para os máis novos.
Haberá que ver se o tempo acompañada nesa xornada grande, pero en todo caso sempre existe a opción de facelo todo baixo cuberta. Na 25.Ş edición do concurso (17.00) repartiranse 3.5000 euros en premios, coas bases xa dispoñibles na web.
Dobre cita en Corme
Corme é unha vila festeira e así ten quedado claro xa en moitas ocasións, coa resposta da xente ás distintas iniciativas. No caso do entroido haberá dúas paradas. Unha, o sábado 2 de marzo, coa cita organizada pola asociación Comisión de Festas en colaboración co Concello. Farán un Entroido Mariñeiro con música, gastronomía (a segunda Festa dos Follados) e disfraces. O ritmo comezará ás 14.00 horas na praza da Ribeira, coa orquestra Trébol, que tamén actuará na verbena xunto con Marmike. A temática deste ano xira en torno aos piratas, polo que quen queira pode ir disfrazado ao baile. Por outro lado, os Farrapos de Cesullas percorrerán as rúas na ronda das 20.00 horas. Degustación de sobremesas e actividades para os máis novos (pintacaras, personaxes infantís...) integran tamén o programa da xornada.
Tres días máis tarde, o 5 de marzo, haberá unha gran festa organizada polo Concello de Ponteceso no pavillón municipal de Corme. Tamén alí se poderán ver disfraces e probar sobremesas, entre os inchables para os nenos. Todo, a partir das 17.30 horas.
Zas presume de potencial filloeiro coa Baña, Lestedo e Muimenta
As filloas son un dos pratos que marcan a identidade da gastronomía galega en entroido. As da Baña, Lestedo (Boqueixón), Zas e Muimenta (Cospeito) teñen moito que dicir neste tradicional manxar tradicional e precisamente por iso reuníronse onte representantes de cada localidade para mostrar un potencial compartido e para presentar a 16.Ş Festa da Filloa que A Baña acollerá os días 23 e 24 deste mes. É a primeira do calendario filloeiro, apuntan. A presentación da celebración foi unha especie de acto de irmandamento, pero aínda que os ingredientes son os mesmos (fariña, auga, ovos e sal) o resultado é ben distinto. As filloas de Zas teñen, sen dúbida, unha aparencia totalmente distinta: redonda, de sesenta centímetros de diámetro e elaborada sobre un ferro de ferro fundido cun acabado de aceiro, o que se traduce nun sabor e unha textura única. Semella unha peza de encaixe. Sábeno ben quen as probaron días atrás no exitoso Trail.
Achega das entidades á festa de Malpica
En breve coñeceranse todos os detalles do entroido de Malpica, pero de momento xa se vai sabendo algunha achega de entidades. O sábado 23 de febreiro haberá un taller de piñatas coa asociación Carcaxía: de 16.00 a 19.00 horas, para nenos a partir de 4 anos. Os interesados poden inscribirse ata o día 20, cun custo de 3 euros para socios e de 5 para os non socios.
Corcubión repartirá uns 900 euros en premios
En Corcubión a xornada crave do entroido será tamén o sábado 2 de marzo. O cartel xa anda circulando polas redes, cun desfile previsto para as 16.30 horas se o tempo o permite. Despois, a actividade trasladarase á Casa dá Cultura (17.00). Haberá 900 euros en premios: categorías individual, grupos e comparsas.
O concurso de Vimianzo, o sábado 2 de marzo
O entroido de Vimianzo -tanto o da capital municipal como o de Baíñas- ten cada vez máis tirón. No primeiro caso o día grande será o sábado 2 de marzo, polo que comparsas, grupos, parellas e entroideiros individuais teñen que ir facendo xa oco na súa axenda. Os interesados en presentarse ao certame poden consultar as pases na web municipal: é www.vimianzo.gal.