Ou popular home do tempo abriu en Íntegro ou ciclo «Inverno dá memoria»
24 ene 2014 . Actualizado á 13:23 h.A faciana máis recoñecible do tempo en Galicia, Santiago Pemán, deixouse ver onte en Cabana para inaugurar o ciclo cultural municipal Inverno da Memoria compartindo nas instalacións da asociación Íntegro unha animada velada dedicada á meteoroloxía.
Co heterodoxo estilo co que se fixo famoso, Pemán falou dos xeitos tradicionais de predicir o tempo, como as témporas, e dos primeiros calendarios que trataron de sistematizar os coñecementos populares sobre esta cuestión, como é o caso do Mentireiro Verdadeiro ou do Zaragozano.
A súa intervención, salpicada por un inesgotable filón de refráns -segundo explicou ten recompilados máis de seis mil- deu paso a unha quenda de preguntas na que os presentes se interesaron por cuestións como o influxo que exerce a lúa sobre o tempo, as persoas, os animais e as plantas, ou os temporais que azoutan as costas da comarca que semellan ser máis intensos nos últimos anos. Pemán pronunciouse tamén sobre o cambio climático para desmentir a aqueles que seguen a negar a súa existencia.
O acto, celebrado nas instalacións da Íntegro en Nantón -co seu presidente, Adolfo López Baña, exercendo o papel de anfitrión- xuntou a un público moi numeroso.
Día da paz
A próxima cita do Inverno da memoria será o xoves da próxima semana no auditorio municipal (10 horas) para celebrar o Día da Paz e achegarse tamén un pouco máis á cultura xaponesa. Participarán os nenos dos colexio As Revoltas e do CRA Os Remuíños.