Os campamentos de conciliación de Ribeira conxelan os prezos e organizarán máis excursións

O Concello de Ribeira abriu o prazo de inscrición nos campamentos de conciliación. Os prezos mantéñense con respecto ao ano pasado e organizaranse máis saídas ao exterior, atendendo así as demandas das familias para evitar que os nenos estean tanto tempo na aula.

O concelleiro de Servizos Sociais, Vicente Mariño, presentou a oferta deste verán acompañado da coordinadora do departamento, Francisca Vidal, e da representante de Golfiño Xestión de Lecer, Ana Pérez. O edil ribeirense destacou a gran demanda destas actividades dirixidas a nenos e nenas de entre 3 e 12 anos cuxo obxectivo é que «pasen unhas vacacións de ocio e diversión atendendo a contidos de todo tipo».

As familias poden anotarse ata o 12 de xuño, xa sexa de forma presencial na Oficina de Atención ao Cidadán, ou telemática a través da sede electrónica. A lista de admitidos publicarase o día 16.

O campamento Xoga coNnosco ten un prezo de 85 euros ao mes ou de 150 para todo xullo e agosto. O de inglés, denominado Summer Camp, costa 95 euros mensuais e 170 todo o verán. En canto ao campamento urbano, a tarifa é de 42 euros. Mariño lembrou que os colectivos vulnerables teñen un desconto do 20%.

O horario é de 9.00 a 14.00 horas, aínda que se prestan servizos de madruga e comedor para as familias que o necesiten, abarcando así un período desde as 7.45 ata as 16.00 horas. Toda a información figura no apartado «Ribeira Concilia» da páxina web do Concello.

---

---

---