Naseiros de Ribeira rexeitan os tres meses de paro na captura de polbo e din que é inasumible
RIBEIRA
As dúas flotas maioritarias na captura de cefalópodo son a ribeirense e a de Bueu
27 mar 2025 . Actualizado á 20:13 h.Á falta de cinco días para deixar en terra as nasas de polbo polo inicio dun período de inactividade de tres meses —un de paro biolóxico e dous de veda— naseiros de Ribeira están en pé de guerra contra unha decisión que cualifican de inasumible economicamente. Un profesional do sector sinalaba: «Ribeira non pode estar tantos meses sen polbo» e engadía que «sabemos que hai que parar, pero non nestas condicións».
A ultima hora do martes tivo lugar unha reunión na que o patrón maior e presidente da Federación Galega de Confrarías, José Pérez, deu conta dos protocolos para seguir e tamén das directrices de acceso para as axudas que se outorgarán polo mes de veda. Foi durante ese encontro onde os naseiros mostraron o seu total rexeito á decisión adoptada pola Consellería do Mar.
Un dos asistentes indicou que as dúas flotas maioritarias na captura de cefalópodo son a ribeirense e a de Bueu. No caso de Ribeira, sinalan que desde o primeiro momento en que se consultou ao sector apoiaron unha veda de dous meses.
Outro dos profesionais que acudiron á reunión recalcou: «Non queremos axudas. Nós somos empresas e temos que mirar polo noso. Impuxéronnos este paro, cando Bueu e Ribeira aportamos o 80 % do polbo que se comercializa nas lonxas». Ao mesmo tempo, criticou o que considera unha falta de control por parte dos organismos competentes no que respecta á captura do cefalópodo por parte de embarcacións da sétima lista.
Pago da seguridade social
Ademais dos tres meses de inactividade, os naseiros discrepan co feito de ter que abonar as cotas da seguridade social durante ese tempo.
Un deles aseguraba que economicamente resulta difícil de asumir: «Aínda estou pagando o barco, isto é matarme». Este naseiro apuntaba que «non hai un só punto dos aprobados nesta regulación que aprobemos». No seu caso, tamén relataba que ten embarcados a mariñeiros foráneos que levan pouco tempo e aos que, explicou, non lles vai a corresponder a cobranza de axudas: «Non van quedarse parados, seguramente buscarán outras alternativas e despois a ver quen atopa xente para saír ao mar».
Así mesmo, indican que as axudas non as percibirán ata finais de ano, algo que tamén consideran inasumible. O colectivo ribeirense solicitou ao patrón maior a convocatoria dunha nova reunión para abordar este tema. Con todo, en principio non está previsto que leven a cabo acciones de protesta.