Dúas empresas de Ribeira e A Pobra necesitan incorporar 50 operarios
06 feb 2025 . Actualizado á 14:31 h.A industria foi sempre un dos grandes xeradores de emprego en Barbanza, e segue séndoo. Dúas importantes empresas radicadas en Ribeira e A Pobra lanzaron unha oferta de traballo para incorporar 50 novos operarios.
A primeira é unha firma do sector conserveiro que ofrece un salario de algo máis de 1.500 euros brutos ao mes e un contrato inicial de tres meses, con posibilidade de renovación en función da valía do empregado e o volume de traballo. As funcións para realizar por parte dos operarios de fábrica consisten na preparación de atún, acondicionado e paletizado. A empresa busca profesionais con experiencia previa na limpeza de peixe e dispoñibilidade horaria, xa que se establecen quendas rotativas de 7.00 a 15.00 e de 15.00 a 23.00 horas.
A segunda oferta busca operarios en liña de produción para un provedor líder en packagin sostible, produtos de papel e servizos de reciclaxe situada na Pobra. Neste caso búscase un perfil de persoa proactiva, cunha experiencia de polo menos un ano en liña de produción, unha titulación de ciclo formativo de grao medio e dispoñibilidade para traballar a quendas de mañá, tarde e noite.
A compaña, ademais de recibir candidaturas na web e na súa rede de oficinas, terá representación o primeiro e terceiro xoves de cada mes no centro social de Boiro, onde se entrevistará aos candidatos para as diferentes posicións abertas.
Estas ofertas de emprego xestiónanse a través da empresa especializada en recursos humanos Manpower.