Sanidade anuncia que no 2026 iniciarase o proxecto do novo centro de saúde de Porto do Son

O conselleiro de Sanidade, Antonio Gómez, quixo visitar persoalmente Porto do Son para referendar «ou compromiso que a Xunta» ten con este municipio, onde está previsto levantar un novo centro de saúde. Na súa intervención, o titular autonómico sinalou que o Concello sonense xa fixo todos os deberes para contar con este futuro equipamento e que unicamente «falta que transfiran o terreo e empezar a traballar para o ano que vén, cando se licitará a redacción do proxecto básico de execución».

Anunciou que o futuro centro de primaria converterase nunha gran superficie asistencial —con máis de 1.800 metros cadrados—, que contará con máis consultas para médicos de familia, enfermería e pediatría, así como para novos servizos como odontoloxía e fisioterapia. Estará situado nunha zona céntrica e accesible para os cidadáns, xa que o Concello de Porto do Son decidiu unificar varias parcelas para dispor do espazo suficiente para a construción deste novo inmoble sanitario.

Reparacións

A visita do titular de Sanidade tamén serviu para referendar un convenio de colaboración co goberno local para continuar coas melloras que se están acometendo no centro de saúde actual. Durante o ano pasado realizouse unha actuación na cuberta —por un montante de 12.000 euros— co obxectivo de evitar filtracións de auga; e agora destinaranse 43.000 para levar a cabo novas reformas.

Esta nova intervención, que pagarán a partes iguais Concello e Xunta, consistirá en limpar e impermeabilizar a fachada traseira do ambulatorio para evitar humidades. Ademais, levarán a cabo labores de mantemento na cuberta, onde está previsto repor varias tellas rotas, eliminar musgos e herbas daniñas, protexer as chemineas para que non filtren auga, e finalizar cos traballos de cubrición da entrada principal.

---

---

---