A Xunta investirá 2,2 millóns de euros en mellorar o porto de Portosín
PORTO DO SON
O proxecto inclúe a construción dun pantalán flotante e a creación dun dique flotante para o seu abrigo
16 jul 2025 . Actualizado á 09:29 h.A Xunta investirá 2,2 millóns de euros na mellora do abrigo do porto de Portosín e a ampliación das atracadas. Así o confirmou onte a conselleira do Mar, Marta Villaverde, na visita que realizou ás instalacións e na que estivo acompañada do presidente de Portos, José Antonio Álvarez, e do alcalde de Porto do Son, Luis Oujo.
Villaverde anunciou a firma do contrato coa empresa adxudicataria das actuacións, consistentes na construción dun pantalán flotante de formigón para 17 embarcacións pesqueiras e a creación dun dique flotante para o seu abrigo. A titular de Mar lembrou que estes traballos dan resposta «ás necesidades do sector profesional dun porto de destacada importancia pesqueira como o de Portosín».
Na zona da nave de redes
O novo pantalán situarase na zona da nave de redes e acollerá a 13 barcos de artes menores e a catro do cerco. Para mellorar o acceso e as manobras, o proxecto tamén inclúe un dragado de máis de 400 metros cúbicos de pedra.
Para rematar, Marta Villaverde indicou que as obras contan cun prazo de execución de nove meses e que, con elas, «Portos amplía a capacidade da dársena de Portosín, dando cabida ao conxunto da flota que conta con sesenta embarcacións menores e de cerco».
A representante autonómica lembrou que o de Portosín é un dos portos do cerco «máis importantes de España e de Europa». Ademais, a conselleira lembrou que nos próximos días tamén se iniciarán os traballos de renovación da iluminación exterior das instalacións, substituíndo as actuais luminarias por outras de tecnoloxía led.