O Concello sonense entrega ao Sergas a súa proposta para o centro de saúde
PORTO DO SON
O espazo para construílo sería un inmoble que quedou a medio facer na rúa Outeiro Alto
27 feb 2024 . Actualizado á 05:00 h.No Concello de Porto do Son seguen traballando para contar canto antes cun novo centro de saúde que preste servizo aos veciños do municipio. Esta mesma semana está prevista a entrega a Sanidade do estudo topográfico e dun informe que avale o bo estado da estrutura dun inmoble que quedou a medio facer na rúa Outeiro Alto e que o goberno local considera que é a proposta máis adecuada para habilitar as novas dependencias sanitarias.
O mandatario de Porto do Son, Luis Oujo, recoñeceu que esta construción cumpre os requisitos esixidos polo Sergas, tanto a nivel de superficie como de alturas, e cree que non haberá ningún problema para que saia adiante. Ademais, desta forma conseguirase acabar cuns dos máximo expoñentes do feísmo no municipio.
No caso de que finalmente Sanidade non estea de acordo con esa proposta, o Concello dispón doutra parcela que tamén podería albergar o futuro centro de saúde, unha leira lindeira coa casa do concello que dispón de 2.200 metros cadrados.