![](https://img.lavdg.com/sc/RoeglXvMKt2jNfa8v-XFfz613a0=/480x/2024/06/04/00121717501981548633263/Foto/B07S7019.jpg)
Participarán os institutos Poeta Añón, Virxe do Mar e Xelmírez I, así como o conservatorio noiés e a escola Oitos
05 jun 2024 . Actualizado á 10:32 h.A rede escolar Climántica é a promotora dos actos que este xoves terán lugar en Noia co fin de conmemorar o Día Mundial do Medio Ambiente. Participarán os institutos Poeta Añón de Outes, Virxe do Mar e Xelmírez I de Santiago; aos que se sumarán o conservatorio de música local e a escola de danza Oito Oitos. O encontro desenvolverase entre as 9.45 e as 13.30 horas no coliseo.
O invitado especial será Anxo Carracedo, xenetista que lidera o proxecto de innovación educativa Erasmus+ que obtivo en España o máximo financiamento por parte da Unión Europea. Ofrecerá unha conferencia sobre este plan, que busca promover a aprendizaxe sobre as consecuencias do cambio climático na saúde debido á perda da biodiversidade polo impacto nas praderías mariñas.
O proxecto, no que participan os tres institutos que se darán cita no Noela, está liderado polo Grupo de Medicina Xenómica da USC.
O encontro no Noela culminará cunha representación teatral sobre unha viaxe no tempo que é froito dun traballo colaborativo no que participaron os cinco centros formativos.