Stefanía Montagna, a «coach» que deixou a ONU e Google para emprender en Carnota

O éxito é un concepto moi relativo. Para algúns, o chegar lonxe na vida ten que ver con percibir un salario alto e poder permitirse gozar dunha gran casa cun bo coche no garaxe. Para outros, con todo, a felicidade está nas pequenas cousas, pero sobre todo nunha: estar tranquilo.

É doado dicir que o mellor para estar ben é deixar un traballo tóxico no que un sente que lle cortan as ás, pero moi difícil levar a cabo a fazaña. Unha desas persoas que si se atreveu a dar o paso é Stefanía Montagna (Milán, 1984), unha italiana afincada en Carnota á que non lle tremeu o pulso á hora de dar un xiro de 180 graos á súa vida. Aínda que pareza mentira, o devir da barbancesa de adopción podería resumirse en querer mirar máis aló das montañas que rodeaban o Val de Aosta, a súa rexión natal: «Sempre pensei que o mundo estaba alén».

Os seus primeiros pasos moi lonxe do fogar foron sobre as terras do estado de Pensilvania, cando con 16 anos fixo un intercambio no que viviu durante 12 meses cunha familia estadounidense. «Aquela experiencia serviume para entender que todo o que cría saber do mundo era relativo». Desde aí marcouse dous obxectivos: viaxar o máximo posible e gañarse o pan creando. Para iso, escolleu o grao de Relacións Internacionais.

Un currículo único

A italiana non se conformou con iso, senón que fixo un Erasmus en Noruega e unha estancia en Francia durante os seus estudos: «Mentres estaba alí ofrecéronme ir de prácticas a calquera parte do mundo e escollín Venezuela porque tiña amigos de alá e quería aprender a bailar como eles». Entre danza e danza vital, Montagna aprendeu cinco idiomas, os mesmos que un tempo despois lle abriron as portas da ONU. Despois doutro período como bolseira en Xenebra foi destinada a Benín, a capital do estado de Edo, ao sur de Nixeria .

 

Alí, a súa función foi a de involucrarse nun proxecto para a redución da pobreza e a inclusión das mulleres. Concretamente, ela dedicábase a asesorar aos membros do goberno sobre como empoderar á mocidade e explotar o talento feminino fomentando a igualdade.

Lembrando aqueles anos, sinala que este obxectivo estaba moito máis lonxe do que ela pensaba: «Cada vez que eu falaba aqueles homes baixaban a vista, era o oposto á inclusión». Ao final daquela aventura, a estranxeira estivo segura dunha cousa: necesitaba un traballo que se adaptase ao seu atípico currículo. A solución foi apostar polo mundo das empresas tecnolóxicas. Á coach sempre lle encantou demostrar iso de que nada é imposible, por iso en 2011 decidiu pórse en contacto con Google e probar sorte alí.

Sen medo a nada

A pesar de non ter amplos coñecementos en publicidade, a profesional soubo gañarse un posto neste departamento grazas ao seu dominio de varios idiomas e á experiencia como guía turística que collera na súa época en Noruega . «O país non tiña moitos edificios históricos e cando me dicían iso os turistas contestáballes que mirasen a fermosa natureza», lembra entre risos.

A carnotá de adopción, que tamén traballou na monetización de contidos xornalísticos para grandes medios de comunicación na empresa norteamericana, caeu na conta no 2018 de que tiña 32 anos e seguía preguntándose cando ía empezar a súa vida: «Souben que quero traballar coas persoas». Así empezou un camiño de autoconocimiento a través de diversos talleres e actividades que acabou eclosionando na necesidade de deixar atrás a vida en Oslo e mudarse a lareiras máis tranquilas coa súa parella, Ramón.

O carreiro da felicidade acabouna levando ata Carnota, un espazo no que a italiana atopou o lugar perfecto para reconectar con ela mesma: «Mudámonos xusto antes da pandemia, foi unha oportunidade para volver escoitarme». Na actualidade, a profesional está concentrada en dar talleres e facer actividades de coaching tanto para grupos como para particulares: «Estou a crear redes locais que me están suxeitando».

Montagna considera que todo o mundo, no fondo, é un tesouro do que se pode sacar moito potencial e, sin duda, ela tamén o é.

---

---

---