Carnota busca incentivar o espírito emprendedor con clases para adolescentes
CARNOTA
As sesións son impartidas polo mentor e experto en mercadotecnia Javier Boquete
02 feb 2024 . Actualizado ás 05:00 h.Hai moitos xeitos de facerse un oco no mercado laboral, e unha delas é emprender. Esta é a vía que están a intentar fomentar no IES Lamas do Castelo de Carnota, no que os alumnos de cuarto da ESO reciben información semanal sobre como funciona o mundo dos autónomos e como poderían chegar a fundar un proxecto exitoso no futuro.
As sesións corren da man do mentor e experto en mercadotecnia Javier Boquete, que visita as instalacións do centro cada sete días co obxectivo de ensinar aos rapaces como levar adiante unha idea.
O obxectivo destas clases é que os mozos demostren o seu potencial e sexan capaces de desenvolver plans de negocio que poidan realizarse no rural galego. A iniciativa persegue que vos mozas non teñan que moverse da súa localidade natal para poder traballar no campo desexado.
O proxecto empezou antes das vacacións do Nadal, cando o exdocente universitario pediulles que formulasen ideas de negocios sostibles en Carnota que axuden á desestacionalización do turismo. «O que queremos conseguir nestes catro meses é converter ese concepto en algo viable que lles permita volver á vila o día de mañá, despois de que finalicen os seus estudos».
Para Boquete, o importante é que os sete adolescentes que participan nas clases, sexan conscientes da súa propio potencial e que isto de vexa reflectido na localidade, que co paso dos anos vai perdendo poboación de xeito paulatino: «Que contemplen o emprendemento coma unha saída ademais de traballar nas grandes cidades ou incluso estudar unha carreira é moi bo para as zonas rurais».
Consellos prácticos
Para que unha idea teña futuro é importante que conte cunha boa base, por iso o experto en mercadotecnia dedicou as primeiras clases a explicar aos estudantes as vantaxes do rural. Segundo el, o importante é que eles sintan que os obxectivos que teñen na vida casan cos laborais.
A formación, que acabará no próximo mes de abril, persegue que os rapaces saiban analizar os riscos a ter en conta á hora de emprender un negocio propio.