A xuízo por pegar a dous mozos á saída dun local de lecer nocturno situado en Boiro
BOIRO
Un deles sufriu múltiples feridas na boca a raíz do episodio
12 jul 2025 . Actualizado á 17:13 h.A Fiscalía pide catro anos e medio de cárcere para un home ao que acusa de dous delitos de lesións por agredir a outros tantos mozos á saída dun local de lecer nocturno de Boiro. A Audiencia Provincial de Santiago será escenario do xuízo o mércores. O obxecto do litixio, segundo o Ministerio Fiscal, tivo lugar na madrugada do 26 de xullo do 2020.
Esa noite, relata a acusación, o imputado atopouse cunha das vítimas fóra dun pub, sentada nunha cadeira. Nese momento o implicado tratou de tiralo ao chan e deulle unha cotenada na cara. Ao ver isto acudiu un amigo do agredido, que tamén foi golpeado, rompéndolle as lentes.
Ambos saíron do lugar, aínda que foron interceptados polo procesado nunha rúa adxacente, continuando co altercado. Un deles sufriu múltiples feridas na boca a raíz do episodio. A Fiscalía, ademais da pena de cárcere, solicita que o acusado pague indemnizacións por un valor próximo aos 9.000 euros.