O Memorial Luis Torrado Treus desenvolverase no pavillón de Barraña a partir das 19.00 horas e aínda poderán comprarse entradas no despacho de billetes
24 feb 2024 . Actualizado ás 05:00 h.Ás sete da tarde, no pavillón de Barraña, dará comezo o primeiro Memorial Luis TorradoTreus , unha velada de boxeo moi especial na que se renderá homenaxe a un pioneiro dos deportes de contacto en Barbanza, que faleceu no 2019 cando sufriu un accidente mentres montaba dacabalo. Detrás desta iniciativa están os que creceron con el e que agora continúan co seu legado no Club Torrado Treus. Un dos seus adestradores é tamén promotor da cita, Jose Antonio Fernández verá este sábado o resultado de moitas horas de traballo. Sete combates, con dous profesionais e un título galego en xogo, son os grandes atractivos da velada.
No pavillón instalaranse pantallas nas que se proxectarán fotos de Luis Torrado Treus e tamén se agarda que poidan acudir familiares do falecido, que está previsto que sexan agasallados con flores e unha placa conmemorativa. No apartado deportivo, haberá varios focos de atención.
Os tres primeiros combates serán amateur e suporán o debut de tres púxiles barbanceses no ring. Rubén Faba, pobrense de 16 anos, abrirá a velada enfrontándose a Aarón Romero , do Club de Loita Noia. Seguiralle a pelexa do seu compañeiro Hugo Sieira, boirense de 16 anos, contra Marcelo Garrido, do Pibe de Sanxenxo. Para pechar esta fase da velada subirá ao cuadrilátero Adrián Fernández, púxil de Boiro de 23 anos, para verse as caras con Adriano Fentanes, do club noiés.
Tras a posta en escena dos boxeadores locais chegará a hora da pelexa que decidirá a campioa galega neoprofesional en menos de 61 quilos. A ribeirense Clara Milleiros xogarase o título con Lorea Murgoitio, que chegou a competir como profesional.
Os profesionais
Despois do cuarto combate haberá un descanso no pavillón de Barraña. Logo, ao ring subir Manuel Castro e Adrián Garrido para quentar o ambiente antes da chegada dos profesionais. O primeiro combate desta categoría estará protagonizado por Wilson Tabares e Joel Sánchez, en menos de 57 quilos. A velada pecharaa a pelexa entre Wilker Fania e Alexander Zedelón, de menos de 63 quilos.
Aínda se poderán comprar entradas en despacho de billetes antes do comezo da velada, cun prezo de 12 euros en bancada e de 14 para as cadeiras.