Dieste: «Para a moción de censura eu era un cadáver político, e non o admitín»
BOIRO
O portavoz do PP de Boiro cualifica de chantaxe a estratexia para lograr o pacto
08 oct 2021 . Actualizado ás 05:00 h.Decenas de reunións, dimes e diretes, cambios de bando, tensións no seo dos partidos, e unha moción de censura que non parou de sobrevoar Boiro. Entre bambalinas, a xestión do novo tripartito ha tido moitos protagonistas -directos e indirectos- que puideron provocar que a cadeira de brazos da alcaldía tivese novo dono nos últimos meses. «Isto de agora é unha pantomima, onde se tirou proveito de acosar ao alcalde. É unha manobra nobre, non se lles pode culpar de que non busquen máis que o ben de Boiro , pero que cambiou agora? Do bloqueo do que falan sácase ao pobo votando a favor, e iso xa o podían ter feito antes Cidadáns e Boiro Novo», afirma con rotundidade o portavoz do PP boirense, Juan José Dieste, que non ten moita fe en que este novo pacto perdure ata as próximas municipais.
O ex rexedor é consciente de que desde hai 26 meses, persoas do seu partido e Carlos Rodríguez Muñiz comezaron a negociar para impulsar un cambio de goberno en Boiro, ao que el se negou desde un principio. «Para a moción de censura eu era un cadáver político, e non a admitín, o único que buscaban era descabezarme a min. Era unha moción de censura antidemocrática na que se propuña como alcalde a unha persoa que non encabezou ningunha lista e eu sempre defendín a opción real que saíu das urnas, que é a vontade do pobo e non outra alternativa adulterada», apunta.
Aínda que moitas das negociacións levaron a cabo ás súas costas, Dieste tivo coñecemento delas hai uns meses, pero seguiu opóndose a esta manobra de cambio de goberno en Boiro, momento que, segundo apunta, aproveitaron algúns «para empezar a xogar a dúas augas e ver quen era o mellor pagador. Había que buscar un sitio no Concello, e se non era a través do Partido Popular, sería a favor doutros. O que antes era un bloqueo, agora desbloquéase antepondo o interese persoal», sinala Dieste.
Para o portavoz dos populares, todos estes meses se teceu unha «escura operación de acoso, derriba e chantaxe» da que tiraron proveito Cidadáns e Boiro Novo. «Doures Torrado foi moi intelixente, ha ir xogando os seus tempos, gañando protagonismo nos plenos falando dun bloqueo que dicía que era culpa do PP e que agora intenta desbloquear para xustificar o tripartito», destacou.
Ao servizo do pobo
Aínda que é consciente de que o seu grupo non atravesa o seu mellor momento, a intención de Juan José Dieste é acabar o mandato como portavoz do grupo municipal e seguir facendo oposición, «porque eu sempre seguirei estando a disposición da vila de Boiro. Se o PP queira que siga, eu sigo», insistiu, para logo lembrar que leva máis de 40 anos vinculado a esta formación política, e que se sente satisfeito do traballo realizado.
Recoñece que sempre hai cousas que puideron facerse mellor, pero que sacou moitos proxectos adiante, e sempre antepuxo o interese do pobo mesmo ao do seu partido, «que foi algo que aprendín do meu pai. Se Boiro necesita de min, eu acudirei. Se o PP prescinde de min, seguirei pendente da xente do meu municipio».
Entende que o que se necesita agora é renovar o partido no municipio, «e eu axudarei no que faga falta ao Partido Popular. Xa o fixen unha vez e podo volver facelo se iso é o que queren», insistiu Dieste.
Antonio García: «Este pacto de goberno chega demasiado tarde, e seguen sen ter maioría na corporación»
Foi o último en incorporarse á corporación boirense tras a renuncia de Manuel Velo, e a súa chegada prevíase como un golpe de temón que serviría para impulsar esa anunciada moción de censura que Antonio García Castro segue negando. «Se falou dela sen base ningunha e co único obxectivo de que fose unha distracción. Sacouse unha foto a tres amigos comendo xuntos e fixéronse castelos no aire».
Na súa opinión, o novo tripartito de Boiro será positivo «sempre que sexa para chegar a acordos e desatascar o concello. Sen embargo, este pacto de goberno chega demasiado tarde e seguen sen ter maioría na corporación. Están nas mans do BNG para chegar a nove», lembrou. Neste sentido, García Castro recoñeceu abertamente que desde o executivo local de Boiro mantiveran contactos con el, «e ofrecéronme participar e poder entrar. Non descarto nada, pero polo de agora non o vexo como unha opción. Comigo seguirían estando en minoría».
O concelleiro de IC Boiro recoñeceu que a súa intención é traballar en positivo para que o municipio avance, e apoiará todos os proxectos que considere importantes, e tamén quere que impulsen todos os que o seu partido propoña.
Fiscalizar
«Nós estaremos para apoiar, pero tamén para fiscalizar a xestión municipal», puntualizou, para logo engadir que queda moito traballo por facer e apenas 18 meses: «Os grandes proxectos levan moito tempo realizalos e non queda tempo».
Pola súa banda, non será ata hoxe, ás 11.00 horas, cando os concelleiros do BNG boirense, Raquel Suárez e Carlos Ansoar, ofrezan a súa valoración sobre o novo tripartito. O partido nacionalista non quixo entrar a formar parte deste novo goberno, aínda que o seu papel se antolla fundamental para poder darlle a maioría ás súas propostas.
