Dieste di que Boiro merece unha residencia «con máis xustificación que Ribeira, pero hai que pelexala»
BOIRO
O ex alcalde lembra que o seu grupo elaborou unha proposta para levantar un xeriátrico e que tiña investidores para facelo
30 sep 2021 . Actualizado ás 05:00 h.Non hai partido político nin alcalde que nos últimos trinta anos non teña loitado porque Boiro contase cunha residencia para maiores como se foron abrindo noutros municipios da comarca como A Pobra, Ribeira ou Noia. Con todo, todas as propostas se han ir quedando polo camiño, e o recente anuncio da construción dun centro de maiores comarcal no edificio de Hesta Kurva foi outro pau para as pretensións do executivo boirense. Con todo, houbo un momento, cando gobernaba o popular Juan José Dieste, no que se chegou a un principio de acordo entre Xunta e Concello para poder dispor deste servizo impulsado por investidores privados.
«Presentámoslle dúas veces o noso proxecto a Núñez Feijoo e tamén me reunín con Fabiola García para falar do tema. Xa me dixeron que a Xunta non tiña previsto investir na construción de novas residencias, pero que había disposición de colaborar e de financiar un 60 % das prazas», apunta o portavoz do grupo municipal popular. Na súa proposta -que prevía situar o novo xeriátrico en Goiáns- apostábase por un moderno complexo que ademais de atención a maiores, tamén incluía zona de hospitalización e un centro de investigación, «algo similar ao que se expón nas residencias que vai construír agora a Fundación Amancio Ortega nas grandes cidades», sinala Dieste, que ademais conseguira o respaldo de varios investidores para materializar a iniciativa.
Con todo, nas eleccións do 2019 houbo cambio de bastón de mando no Concello e todo quedou paralizado. «O alcalde nunca se interesou en coñecer a nosa idea, e o outro día mesmo me botou a culpa de non querer a residencia porque na súa proposta de orzamentos ía unha partida de 40.000 euros para redactar un novo proxecto, e nós votamos en contra. Que quede moi claro que nós estamos a favor da residencia, pero tamén é verdade que non se nos pediu axuda», insiste.
Boas xestións
Juan José Dieste tamén recoñece que a decisión da Xunta de construír unha nova residencia en Hesta Kurva prexudica os intereses do seu municipio, pero é consciente de que o alcalde ribeirense, Manuel Ruiz Rivas, soubo xogar moi ben as súas cartas.
«Boiro merece unha residencia con máis xustificación que Ribeira, pero hai que pelexala. Vivimos nunha época complicada para realizar investimentos, e Ruiz é un bo político, con moita chegada, que soubo ir a Europa a buscar o diñeiro», aplaude o portavoz do grupo popular boirense.
Por todo iso, considera que é misión do rexedor de Boiro, José Ramón Romero , facer o mesmo e loitar por un centro para os maiores de Boiro, e que para iso «terán sempre o noso apoio, que os acompañaremos onde dígannos, pero teñen que pedilo».