A Garda Civil de Boiro detivo a un home que ameazou a unha muller cun coitelo para roubarlle

Axentes da Garda Civil do posto de Boiro procederon á detención dun home como presunto autor dun delito de roubo con violencia e intimidación en grao de tentativa. Ao parecer, o arrestado tería ameazado a unha muller cun coitelo para que lle dese diñeiro.

Os feitos producíronse nun caixeiro automático da avenida da Constitución, na localidade boirense, cando presuntamente o home, de 55 anos de idade, ameazou cun coitelo no pescozo a unha muller de 39 anos coa intención de que lle dese o diñeiro que acababa de sacar. Nese momento produciuse un forcexo e o atacante fuxiu sen que a vítima sufrise ningunha lesión. Finalmente o home foi detido.

As dilixencias por estes feitos foron remitidas ao Xulgado de Instrución número 3 de Ribeira.

---

---

---