Os expertos acharon unha construción de forma rectangular cuxa cuberta de cerámica conservouse de forma óptima
18 ago 2018 . Actualizado ás 22:48 h.Podería dicirse que todos os veráns se realiza algún descubrimento relevante nos campos de traballo do castro de Neixón, actuación enmarcada nos cursos de arqueoloxía práctica que financia o Concello de Boiro. No entanto, moi poucos agardaban atoparse, onte, coa noticia de que as antiquísimas construcións do xacemento gardaban un pasado máis próximo ao noso presente. Os expertos desvelaron que Neixón tivo unha fase de ocupación medieval, feito que foi recibido con sorpresa se se ten en conta que os traballos no castro Grande estaban dirixidos a sacar á luz vivendas que, presumiblemente, estarían enmarcadas no século V a. C.
Para chegar a esta conclusión, os expertos contaron con pistas especialmente importantes, como a determinante aparición dunha construción cuxa cuberta de cerámica atópase nunhas condicións máis que aceptables, con tezas practicamente enteiras e que conservan as cortes ou guías labradas para encaixar na estrutura completa. En total extraéronse 200 quilos destes vestixios, que se unen a unha cantidade considerable de pedras do parapeto defensivo. Outra das curiosidades desta cerámica é que algunhas pezas contan con pegadas de aves da época que poderían achegar máis datos valiosos.
«Esperamos chegar aos niveis de ocupación antes de que remate esta actuación para saber máis sobre a actividade que tivo lugar no pasado», explicou o arqueólogo Víctor Barbeito, encargado de presentar os descubrimentos e que estivo acompañado do alcalde boirense, Juan José Dieste, e da concelleira de Cultura, Helena Teixeira, quen comprobaron sobre o terreo os avances deste ano, a falta dunha semana para que finalice a segunda quenda dunha campaña que contou cun investimento municipal de preto de 30.000 euros.
A muralla
As previsións sobre o desterre do parapeto defensivo, a outra gran tarefa desta intervención, cumpríronse e deixouse ao descuberto o punto máis elevado dunha muralla na que se acharon vestixios romanos (século I a. C.). Barbeito destacou que as traballadas pedras son de granito, material que non se atopa na zona e que proba o enorme esforzo construtivo que realizaron os seus creadores. Por outra banda, os expertos non conseguiron achar unha fogueira na construción medieval, cuxo fin se descoñece, pero si sedimentos que permitirán datar o momento no que se erixiu.
«Estamos moi agradecidos, pois esta inversión serve para poñer en valor o patrimonio e para formar a futuros investigadores», explicou o rexedor, quen tamén se referiu aos achados realizados en Moimenta pola universidade compostelá e que non descarta seguir redobrando o financiamento destinada a explorar aínda máis a arqueoloxía local.
