O concello pobrense vive para a ría, con múltiples experiencias para que os visitantes poidan descubrir todos os seus tesouros
26 jun 2025 . Actualizado á 09:25 h.A historia da Pobra non se entendería sen o seu mar, o apelido dunha localidade con moita tradición e atractivos que cada verán a converten nun polo de atracción de centenares de visitantes. Moitos deles chegan aquí buscando gozar das súas praias, con augas tranquilas, temperaturas suaves e múltiples servizos para. Non en balde a da Lombiña-Cabío revalidou este ano a bandeira azul, á que engade o distintivo de calidade Sicted —que concede a Secretaría de Estado de Turismo—, co que tamén contan os areais da Illa e Vos Areos.
O mar tamén está moi presente na programación estival que deseña a concellaría de Turismo, que busca que veciños e visitantes descubran todos os tesouros que esconde a ría de Arousa. Un ano máis, durante os meses de xullo e agosto, repetiranse as viaxes en veleiro, aos que se unirán este verán unhas singulares rutas do mexillón, nas que os participantes subirán a bordo de embarcacións tradicionais para coñecer de preto como se realiza o cultivo deste bivalvo.
O éxito cultivado en anos anteriores tamén fai que se repitan as travesías en catamarán ás illas Cíes e Ons, e os visitantes tamén terán a oportunidade de descubrir o mundo do marisqueo a pé nuns orixinais talleres que lles levarán a meterse no mar para buscar os cobizados moluscos.
Deporte e mar tamén van inexorablemente unidos na Pobra, que nos últimos meses foi escenario de diferentes competicións de remo, como a primeira Bandeira dá Deputación, o Campionato de España de Traineiriñas ou a liga Galega de Traíñas. A elas sumarase o 12 de xullo a vixésima Bandeira Concello dá Pobra.
O monte da Curota, as piscinas naturais do río Pedras, o centro histórico ou os xardíns Valle-Inclán son outros lugares de visita obrigada.