Medio centenar de vehículos participaron nunha caravana reivindicativa que percorreu a comarca
29 ene 2025 . Actualizado á 16:30 h.Pagar 11.000 euros pola póliza do seguro dun taxi é unha cantidade inasumible para un profesional deste servizo público. Así o denunciaron esta mañá en Barbanza os condutores que decidiron protestar por «estas subidas abusivas» realizando unha caravana reivindicativa que partiu de Ribeira ás 11.00 horas.
Foron dez dos vinte taxis que hai nesta parada os que saíron da capital barbancesa pola AC-305 rumbo á Pobra, onde se xuntaron cos compañeiros dese municipio e realizaron unha concentración de 15 minutos ás portas do Concello. O percorrido seguiu logo por Boiro, Rianxo e Porto do Son, para finalizar, sobre as 14.30 horas en Ribeira, onde preto de medio centenar de vehículos concentráronse ás portas do antigo auditorio, onde foron recibidos polo alcalde, Luís Pérez Barral, e por varios membros do seu equipo de goberno.
«Aos taxistas englóbanos igual que ao Uber ou aos Cabify, que teñen máis sinistros, e se antes pagabamos 1.000 euros de seguro, agora queren chegar aos 11.500 euros, como lle dixeron a un compañeiro de A Pobra. Os taxis non podemos pagar iso», denunciou a presidenta dos profesionais de Ribeira, Raquel Rodríguez, que agradeceu a todos os compañeiros que se uniron nesta primeira medida de presión para conseguir frear esta escalada abusiva de prezos. Insistiu en que esta loita, que se desenvolveu de forma paralela en toda España, «é para loitar para todos non para un só. Canto máis forza mellor».
A terceiros
Explicou Rodríguez que os novos taxis que se están incorporando ao servizo xa non poden subscribir un seguro a todo risco, porque a contía das pólizas que lle piden é desorbitada. «Teñen que facelos a terceiros e están pagando 2.000, 3.000 e incluso 5.000. Se seguimos así, para nós e inviable», explicou a profesional ribeirense, que recoñeceu que solicitaron axuda tanto a concellos, como á Xunta ou ao Goberno central.
O balance desta primeira medida de protesta foi máis que positiva para os taxistas de Barbanza, aínda que sinalaron que, a pesar de parar diante de todos os Concellos, só foron recibidos polo alcalde de Ribeira. Luís Pérez Barral mostrou todo o seu apoio aos profesionais, e recoñeceu que «é un servizo esencial, non só para Ribeira, senón para toda a comarca do Barbanza. Este país é eminentemente rural, sabemos das deficiencias do transporte público por estrada, e polo tanto, o servizo de taxi faise máis esencial para as persoas que queren ir aos centros médicos, hospitais ou facer calquera xestión».
Sinalou que os profesionais do sector teñen que ter uns seguros axustados ás súas demandas, «e non unhas cantidades disparatadas como as que estamos vendo». Por iso, Pérez Barral reclamou ao Goberno central, «que actúe ante as aseguradoras para que eses prezos non sexan abusivos e sexan acordes as demandas dos taxistas».