O Club Náutico de Ribeira acolleu a entrega de premio da competición que leva o nome do empresario
26 jun 2024 . Actualizado á 05:00 h.A mellor flota do panorama autonómico da vela sucou a pasada fin de semana augas barbancesas nunha nova edición, e xa van 24, da Regata Ramiro Carregal Rey. Como non podía ser doutro modo, o colofón á competición deportiva chegou coa entrega de premios e uns petiscos que reuniron a tripulacións e autoridades nas instalacións de Club Náutico de Ribeira. Non faltou á cita o propio impulsor da proba, que entregou o trofeo aos gañadores.
Foi unha celebración que serviu tamén para reforzar os lazos que unen ás dúas entidades que colaboran na organización dunha das citas máis emblemáticas da vela galega. Non en balde, historicamente, a proba ha hermanado ao Real Club Náutico de Portosín co de Ribeira, unha unión chamada a perpetuarse.
Grande ambiente
No deportivo, librouse unha dura batalla marítima entre as rías de Muros-Noia e Arousa, pero unha vez finalizada a competición reinou entre as tripulacións participantes un grande ambiente de camaradería. Uns e outros comentaban as vicisitudes da regata mentres compartían mesa e mantel antes da repartición de trofeos na sede do Náutico ribeirense.
Con Ramiro Carregal como anfitrión, na entrega de premios participaron os presidentes de ambos os clubs organizadores, Jorge Arán e o ribeirense José Luis Torres Colomer. Non se perdeu a cita o alcalde de Porto do Son, Luis Oujo, que acudiu acompañado por dous membros do seu goberno, a concelleira de Cultura, Alicia Martínez, e o edil de Deportes, Carlos Lorenzo. Isaac Gaciño, patrón maior de Portosín, tamén asistiu á cerimonia, do mesmo xeito que o presidente da Real Federación Galega de Vela, Manuel Villaverde.
Este ano, o Gran Trofeo Faro de Corrubedo quedouse na casa xa que llo levou o Siradella, que navega baixo a grímpola do Real Club Náutico de Portosín. Na clase cruceiro-regata a vitoria adxudicoulla o Orión, mentres que en cruceiro o primeiro posto tamén foi para un barco barbancés, o Cámping Ría de Arousa, patroneado por José Manuel Pombar.
Petiscos de confraternidade. Despois da dura batalla marítima que libraron na ría de Arousa, as 22 tripulacións que participaron na proba gozaron dun momento de relaxación e compartiron anécdotas e comentarios sobre os lances da competición cuns petiscos aos que uniron Ramiro Carregal e José Luis Torres Colomer.