O Club Remo Puebla terá sete equipos nun nacional de bateis no que actuará como anfitrión
BARBANZA
Ademais das catro prazas conseguidas por gañar outras tantas medallas no galego, a Federación Española de Remo confirmou que os pobrenses contarán con tres barcos máis
23 abr 2024 . Actualizado ás 14:07 h.No Club Remo Puebla están de parabén. Ademais de vivir un gran mes de abril ao organizar os campionatos provincial, galego e nacional de bateis, a entidade soubo onte que, finalmente, contará con sete equipos no campionato de España, que se celebrará no porto comercial da localidade pobrense durante a fin de semana.
Os barbanceses tiñan catro prazas aseguradas grazas á súa gran actuación no autonómico, cita na que conseguiron dous subcampeonatos e dous terceiros postos. A Federación Española de Remo trasladoulles que os bateis femininos infantil, cadete e absoluto tamén estarán a remar no nacional.
O club cualificou como «grandísima» a noticia: «No 2028 conseguimos clasificar catro equipos e neste ano rompemos todos os récords, participando con sete e, para máis, na casa». Por iso, aseguran estar moi ilusionados «co que vai acontecer esta fin de semana, esa é a nosa enerxía para afrontar todo o traballo que estamos a facer».
A data límite para tramitar as inscricións é este mércores ás 23.59 horas, polo que o xoves xa se poderían coñecer todos os equipos que competirán no campionato de España na Pobra.