Tirán, Robaleira, Chapela, Vila de Cangas, Mecos, Urme e Amegrove tamén triunfaron
22 abr 2024 . Actualizado ás 10:49 h.A calor foi un dos protagonistas no campionato galego de bateis celebrado na Pobra. Moito público no porto deportivo da localidade para ver unhas finais autonómicas nas que sobresaíu Cabo dá Cruz, facéndose cos títulos nas categorías infantil, cadete e sub-23 feminina e na absoluta masculina. Ademais, o Club Náutico Boiro, filial dos crucenses, gañou en cadete masculino. Aínda por riba, Cabo fixo un segundo e un terceiro e a súa filial outro segundo. Era importante subirse ao podio, xa que iso asegura praza no nacional, que terá lugar a próxima fin de semana naPobra .
Tamén ondearon bandeiras Tirán, Robaleira, Chapela, Vila de Cangas, Mecos, Amegrove e Urme. Este último, unión de Muros e Esteirana, venceu no apartado xuvenil masculino tras unha intensa regata na que Chapela, segundo, foi recortando distancia nos últimos metros para entrar a dous segundos do vencedor. Nesta categoría foi terceiro Puebla , que tamén asinou dous subcampeonatos autonómicos e outro bronce.
Rianxo quedou cun, ao conseguir a segunda praza en sub-23 femininos, mentres que a Esteirana, grazas ao seu terceiro posto en alevín feminino, tamén terá a un representante no campionato de España.
Mugardos, Samertolameu, Bueu, Narón, Perillo e Vilaxoán conseguiron meter barcos en podios de diferentes categorías, asegurándose así ter que regresar nuns poucos días á Pobra para disputar o nacional. Menos sorte correron clubs como o Náutico de Ribeira e Ares que asinaron dous quintos, respectivamente.
Tampouco A Cabana-Ferrol conseguiu pisar o podio na regata na que participou, na de infantil masculino.