A Festa do Percebe de Aguiño servirá unha tonelada de marisco no seu 25 aniversario
BARBANZA
A cita desenvolverase o 28 de xullo no porto da localidade e contará coa actuación do grupo local Leite con Jalletas
27 mares 2024 . Actualizado ás 21:13 h.En plena celebración da Semana Santa xa se empezan a albiscar as grandes citas festivas da época estival. Unha das que máis se saborean é a Festa do Percebe de Aguiño, que este ano cumpre o seu 25 aniversario e desenvolverase o domingo 28 de xullo. Nesta ocasión, a previsión dos organizadores é pór unha tonelada deste cotizado e tan demandado crustáceo a disposición dos moitos comensais que, a partir das 12.00 horas, achegaranse ao porto da localidade.
Os detalles da cita avanzáronos durante a súa presentación na improvisada casa consistorial de Ribeira os edís Vicente Mariño, Francisco Suárez-Porta, Fernando Abalde e Antía Alberte, xunto con Manuel Ángel Reiriz, presidente dos mariscadores de Aguiño, e José Antonio Santamaría, patrón maior da confraría.
Vicente Mariño destacou o firme compromiso do Concello ribeirense para darlle impulso a esta celebración gastronómica no ámbito cultural e promovendo tamén o seu impacto social «para converter esta festa nun evento de interese turístico a nivel nacional».
Centenario
Pola súa banda, Santamaría resaltou que este ano a festa cumpre 25 anos e que «comezou grazas a un grupo de xente que se interesou en destacar a calidade do produto da Confraría de Pescadores de Carreira e Aguiño, que cumpre 100 anos». O patrón maior explicou que nesta edición se repartirán os típicos pratos de barro con racións de, aproximadamente, 350 gramos de percebe.
A elección da data non é casual, como comentou Reiriz, xa que se corresponde coas mareas vivas co propósito de achegar o mellor produto posible. A festa é eminentemente gastronómica, pero tamén haberá música para amenizar a xornada e correrá a cargo do grupo Leite con Jalletas, como adiantou Suárez-Porta.