Lara Iglesias asinou a mellor marca española sub-18 do ano en lanzamento de xavelina
BARBANZA
A deportista do Atletismo Barbanza conseguiu o rexistro nunha xornada atípica en Pontevedra
25 mares 2024 . Actualizado ás 11:46 h.As pistas do Centro Galego de Tecnificación Deportiva de Pontevedra acolleron o primeiro Critérium Gus Dacal, no que Lara Iglesias , do Atletismo Barbanza, seguiu demostrando o seu gran estado de forma ao conseguir a mellor marca española do ano, a quinta do ránking mundial e a segunda de Europa na categoría sub-18 en lanzamento de xavelina.
Foi unha xornada atípica, na que os lanzadores viviron un atraso dunha hora, comezaron a competir sen iluminación e chegou a suspenderse por falta de luz. Cando estaban a saír da pista acendéronse os focos e varios atletas optaron por retomar a proba xa co estadio baleiro.
Na quinta rolda as instalacións quedaron se luz e a competición acabouse suspendendo definitivamente sen que se puidesen acabar as últimas roldas.
Aínda así, Lara Iglesias logrou un rexistro de 50,51 metros, o seu segundo mellor lanzamento de sempre e que lle valeu para obter as citadas marcas. O seu compañeiro Enzo López gañou na xavelina masculina con 57,46 metros, deixando moi boas sensacións a pesar de todo o vivido durante o día.
No Atletismo Barbanza apuntan que ambos realizaron unha gran tempada invernal, o que dá esperanzas de conseguir grandes resultados na estival.