Un veciño de Ribeira recorre ao Tribunal Supremo un comiso de cocaína por valor de 33 euros
BARBANZA
Destacou que nun informe se fixo constar que é un vendedor habitual de droga algo que, segundo a súa declaración, non é certo e revela a «inquina» que lle ten a policía
01 feb 2024 . Actualizado ás 16:47 h.Un veciño de Ribeira condenado por tráfico de drogas recorreu ao Tribunal Supremo para tratar de eximirse da condena de 2 anos de prisión que lle impuxeron no Xulgado de Primeira Instancia e Instrución número 3 da capital barbancesa por haber incautado cocaína por valor de 33 euros.
O procedemento polo que resultou culpable iniciouse o 19 de agosto do 2019 na avenida do Malecón. Ese día sobre as 18.30 horas o home atopouse cun coñecido que estaba no interior do seu vehículo, detido á altura dun semáforo.
Segundo a sentenza, o acusado achegouse ao coche e, a través do portelo, entregoulle ao condutor unha bolsita termosellada que contiña 0,371 gramos de cocaína cunha pureza do 73, 42 %, valorada en 33,57 euros. A cambio da droga, o ribeirense recibiu unha cantidade de diñeiro indeterminada. O intercambio foi visto por unha patrulla policial, que procedeu á detención do individuo e ao comiso da sustancia e de 870 euros en efectivo que levaba amais .
O titular do xulgado de Ribeira considerou que os feitos eran constitutivos dun delito contra a saúde pública e de tráfico de drogas, coa atenuante de que o autor padecía unha importante drogadicción, motivo polo que o condenou a 2 anos de prisión e a unha multa de 30 euros. Fronte a este fallo o procesado presentou un recurso ente o Tribunal Superior de Xustiza de Galicia (TSXG) negando ter cometido os feitos e afirmando que non se tivo en conta a declaración do presunto comprador, que aseverou rotundamente comprarlle a cocaína a outra persoa.
Presunción de inocencia
O ribeirense tamén alegou que se vulnerou a súa presunción de inocencia, ademais de que o atestado policial foi redactado «sen as formalidades legais» ao ser «tendencioso e pouco obxectivo». Destacou que no informe se fixo constar que é un vendedor habitual de droga algo que, segundo a súa declaración, non é certo e revela a «inquina» que lle teñen os axentes que o redactaron.
Tamén mencionou imprecisións no testemuño dos policías, aínda que o TSXG considerou que todos declararon que viran ao home realizando o intercambio. O alto tribunal galego rexeitou todas as súas alegacións, o que lle levou a elevar o recurso ao Supremo.
Os argumentos foron practicamente os mesmos e, na súa resolución, a sala valorou o interese casacional da reclamación. Finalmente, atendendo á xurisprudencia e ao xa considerado polo TSXG, o Tribunal Supremo non admitiu o recurso, confirmando as sentenzas anteriores.