Un exempleado dunha armadora de Ribeira estafa a varias empresas cobrándolles por comprar ferramentas que logo el vendía por Internet
BARBANZA
O prexuízo económico causado ás compañas afectadas foi de máis de 8.000 euros
02 feb 2024 . Actualizado ás 11:15 h.A Policía Nacional de Ribeira detivo a un home como presunto autor de delitos de furto e estafa continuados. Varias empresas armadoras foron as que tramitaron a denuncia contra un exempleado dunha delas, asegurando que lles estafou cobrándolles por comprar ferramentas que nunca chegaban e que logo el vendía por Internet .
O home encargábase de adquirir material para a reparación dos buques das armadoras, ás que lles pasou facturas pola compra de ferramentas. Chegados a un punto comprobaron que os aveños non aparecían nos barcos porque non os entregou, momento no que comezaron a sospeitar que se quedou con eles.
A Policía Nacional comezou coas pescudas e comprobaron que o individuo puxera á venda en portais de segunda man en Internet moitas das ferramentas cuxa falta fora denunciada. Os axentes estimaron que o exempleado obtivo un beneficio de preto de 2.000 euros por esta actividade, ademais de causar un prexuízo económico ás empresas afectadas de máis de 8.000 euros.
Finalmente púidose recuperar a maior parte do material, entre o que habían amoladoras, atornilladores de impacto e trades que foron entregados aos seus lexítimos propietarios. O home foi detido e, tras tramitarse as correspondentes dilixencias, foi posto a disposición do xulgado de garda.