Catro carreiros homologado pola Federación Galega de Montañismo invitan a descubrir os tesouros naturais que esconde o destino
16 oct 2023 . Actualizado á 22:19 h.Aínda que a choiva poida en ocasións supor un obstáculo importante, o outono é unha estación que invita a camiñar, a descubrir paisaxes invadidas por un abanico de tons verdosos, marróns e ocres. E Arousa norte é un territorio que se ofrece para ser pateado. A mancomunidade que se encarga de promocionar o destino lanzou unha rede de carreiros integrada por catro roteiros que invitan a descubrir os tesouros naturais que esconden os municipios de Ribeira, A Pobra, Boiro e Rianxo. Trátase de percorridos que contan coa homologación da Federación Galega de Montañismo, están sinalizados e son aptos para todos os públicos.
No municipio de Ribeira, o roteiro seleccionado é a senda fluvial do río de Artes e arrinca na área recreativa situada ao pé da estrada que discorre cara a Corrubedo. No tramo inicial, os camiñantes atoparán un dos principais atractivos do traxecto: un conxunto patrimonial formado por unha fonte e un lavadoiro rehabilitado, que antigamente era utilizado polas veciñas da contorna.
A través de pasarelas e tramos de terra, a senda deixa atrás o Muíño de Correa para chegar á xoia do percorrido: o dolmen de Axeitos, un dos monumentos megalíticos máis importantes de Galicia. Antes do final, nAs Lobeiras de Arriba, aínda é posible gozar de fermosos bosques de ribeira e elementos etnográficos como presas, pasales, pontellas e muíños.
No aparcamento de Aldea Vella arrinca o roteiro homologado na Pobra, unha subida ao monte A Curota seguindo o curso do río Pedras. A ponte medieval de San Xoán da Misela é un dos tesouros que os camiñantes atoparán no tramo inicial e moi preto, poderán ver os restos do antigo convento da Misarela.
O outro punto destacado do traxecto é o miradoiro da Curota, desde onde se pode gozar dunha impresionante panorámica da ría de Arousa. Xa no descenso, é parada obrigatoria o miradoiro de Valle-Inclán, onde se sitúa unha escultura do ilustre escritor. De volta a Aldea Vella, o percorrido discorre entre plantacións forestais.
Entre ríos e montes
Outro río, o Té, marca tamén o percorrido seleccionado pola mancomunidade Barbanza Arousa no municipio de Rianxo, un roteiro que se caracteriza polo seu grande interese ambiental e patrimonial. No inicio, recibe aos camiñantes unha fonte, protexida por un bosque de ribeira formado por amieiros, freixos e outras especies. Ao longo do traxecto hai varios muíños, un dos máis grandes é o de Francuín.
O ambiente húmido da zona e a escaseza de luz debido á frondosidade do bosque favorecen a abundancia de grandes exemplares de fento real e dunha valiosa fauna, na que destacan o merlo acuático, a ra verde, o lagarto verdinegro, o reo e a londra.
O Castelo de Vitres, formado polos vestixios dunha antiga atalaia aos que se accede a través dunha calzada de pedra, é a xoia do roteiro que foi homologada en Boiro. O carreiro parte da aldea de Brazos, onde uns pasales axudarán aos camiñantes para cruzar o río Coroño. Os muíños do río Acevedro e as construcións populares que se conservan en Mosquete son outros dos atractivos da primeira etapa.
A camiñada, tras unha subida por interesantes áreas de bosque autóctono, conclúe no Castelo de Vitres, onde o sendeirista poderá descansar regalando os seus ollos cunha fermosa vista da ría de Arousa.
Con esta rede comarcal de carreiros, a mancomunidade Barbanza Arousa busca fortalecer a súa imaxe de destino familiar, tomando a sustentabilidade e a calidade como bases para o desenvolvemento da actividade turística.
Información. Os percorridos pódense descargar na páxina web www.barbanzarousa.gal.