Os sete edís do PP sonense percibirán retribucións polo seu traballo nas áreas asignadas
BARBANZA
Luis Oujo terá unha nómina de 50.000 euros brutos anuais repartidos en 14 pagas
28 jul 2023 . Actualizado ás 19:14 h.Coa abstención do PSOE e o voto en contra do BNG sacou adiante o PP a súa repartición de competencias e retribucións dos órganos de goberno. Neste mandato, os sete integrantes do executivo con maioría que capitanea Luis Oujo terán algún tipo de dedicación.
Haberá tres absolutas, fronte ás dúas da anterior etapa, e catro parciais. A maior retribución será a do alcalde, 50.000 euros brutos anuais en 14 pagas. Cada un dos outros dous edís con dedicación total, María Maroñas e Manuel Deán, percibirán 30.000 euros.
A maiores, tres concelleiros terán unha dedicación parcial co 85 %. A persoa encargada de Deportes, Carlos Lorenzo, ingresará 28.000 euros brutos anuais. Pola súa banda, o edil de Medio Ambiente, Núcleos Rurais e Conservación, Juan José Dieste, recibirá 22.400 euros. Tamén cobrará esta contía Alicia Martínez, encargada de Cultura, Lecer, Tempo Libre e Turismo.
Finalmente, o responsable de Benestar Social e Igualdade, José Luis Lijó, terá unha asignación bruta anual de 10.473 euros, cunha dedicación parcial do 30 %.
Sobre esta distribución, Luis Oujo recalcou que o desembolso en órganos de goberno mantense, pero distribuído entre os sete integrantes.
Sesións plenarias
Outro dos asuntos sometidos a votación foi o relativo ás sesións plenarias, que pasarán a celebrarse o último xoves de cada mes impar.
Sobre o persoal de confianza, mantense o relativo á secretaría de alcaldía.
Polo que respecta aos grupos políticos, terán unha asignación de 100 euros e unha contía similar por cada un dos concelleiros que os integran.
Pola asistencia a pleno percibiranse 120 euros, por ir ás comisións informativas serán 50 e a retribución na comisión especial de contas ascende a 60 euros.