Numerosos actos litúrxicos acompañarán a roteiros e talleres
22 mar 2023 . Actualizado á 20:47 h.A Pobra engalánase para a Semana Santa máis esperada dos últimos tempos no municipio, na que paisaxe e patrimonio centrarán a oferta turística rodeando aos numerosos actos litúrxicos habituais destas datas.
Un ano máis regresará A nosa feira, unha cita na que un total de 14 postos instalaranse nos xardíns Valle-Inclán desde o 31 de marzo ata o 10 de abril. Os veciños e visitantes tamén terán a oportunidade de coñecer de primeira man o proceso extractivo dos bivalvos. Será o día 5 de abril, cando terá lugar un taller de marisqueo na praia de Vos Areos, que terá un custo de 10 euros para os maiores de 10 anos.
A continuación, o Xoves Santo está previsto que se desenvolva un roteiro polo camiño A Orixe ao seu paso pola Pobra. O punto de encontro desde o que se iniciará a camiñada ás 9.00 horas será o aparcamento da praza de abastos, cun custo de 9 euros para anotarse.
As propostas desprazaranse aos arredores do río Pedras o Venres Santo. Ese día terá lugar un roteiro de dificultade media que se prolongará tres quilómetros. Esta comezará ás 10.00 desde o mercado municipal e o prezo da inscrición será tamén de 9 euros.
O sábado de Pascua a actividade centrarase no patrimonio cun itinerario guiado polo centro histórico do municipio, de dificultade baixa. A xornada complementarase cunha visita á capela do Alba da igrexa de Santiago do Deán. En ambos os casos a saída será desde as inmediacións da Casa Mariñeira, ás 11.00 e ás 16.45, respectivamente. Cada actividade terá un custo total de 3 euros.
Para máis información acerca da programación de Semana Santa ou para inscribirse nalgunha das actividades propostas, os interesados deben acudir á oficina de turismo. Tamén se poden realizar a través do correo turismopobra@apobra.gal ou no 671 090 262, 687 482 835 ou 981 843 280.