As conversacións entre as distintas forzas políticas iniciadas tras o 26M derivaron na Pobra cun acordo de investidura que, de chegar a bo porto, levará ao PSOE a integrarse nun executivo local presidido por Xosé Lois Piñeiro. Para empezar, a edila socialista, Patricia Lojo, anunciou que apoiará ao candidato de Nós Pobra na investidura.
O voto socialista non será suficiente para garantir o nomeamento de Piñeiro como alcalde porque non suman a maioría absoluta, pero se o PP e o BNG non o evitan o actual rexedor en funcións repetirá no cargo. De ser así, nos próximos días formalizarase o pacto de goberno co PSOE para os próximos catro anos en base a un programa conxunto. Lojo explicou que as conversacións para dar forma a ese acordo van ben encamiñadas.