A previsión é que o narco pobrense aterre en territorio nacional procedente de Panamá o día 20
07 novs 2019 . Actualizado ás 19:45 h.José Carlos Pombar Cameán tomarase o turrón en España. Este narco da Pobra, fuxido desde o ano 2004, foi detido o pasado mes de novembro chegando con documentación falsa a un aeroporto de Panamá, país no que permanece aínda á espera de que se execute a orde de extradición. A previsión, apuntaban onte no Grupo de Resposta contra o Crime Organizado (Greco) en Galicia, é que aterre nalgún aeroporto do territorio nacional o día 20, pero non para irse á súa casa a gozar das celebracións do Nadal. A época festiva terá que pasala no penal que decida a Audiencia Nacional, que é o tribunal que, xunto a Greco Galicia e á Brigada Central de Estupefacientes, non cesaron no seu empeño ata dar cun dos considerados peixes gordos do narcotráfico transoceánico entre América do Sur, Europa e África. O traballo de campo, xunto á información manexada, axudaron a localizar e deter a un dos narcos máis importantes de Barbanza e que máis anos estivo desaparecido. África, a ollos da Brigada Central de Estupefacientes, foi o seu cuartel xeral durante o tempo que permaneceu fóra do alcance das forzas da orde, que seguiron a súa pista durante 14 anos. Agardaron un movemento en falso do narcotraficante ata que en novembro foi detido en Panamá.