O Arousa xoga en Betanzos coa necesidade de puntuar para seguir arriba
VILAGARCÍA DE AROUSA
Os vilagarciáns viron recortado a súa marxe para seguir en «play off»
28 mares 2024 . Actualizado ás 05:00 h.O momento da verdade, eses dez últimos partidos do campionato que veu sinalando Luisito desde o principio de tempada, chegou. Xa non hai rede de seguridade e o Arousa non se pode permitir erros se quere clasificarse para disputar o play off de ascenso. É verdade que o técnico tería querido chegar a este momento decisivo coas miras máis altas, pero a competición coloca a cada un a estas alturas onde se merece, e o conxunto vilagarcián, polo menos a tenor do que dita a táboa, non se merece pelexar pola primeira posición e, polo tanto, polo ascenso directo de categoría.
Ao Arousa queda o premio de consolación, que é poder clasificarse para o play off porque de non facelo suporía un fracaso estrepitoso. Par iso a marxe de erro hase estreitado moito tras o tropezo do pasado sábado e tendo en conta o calendario que agarda aos arlequinados, con tres partidos seguidos fóra de casa. O primeiro deles será o desa tarde no campo do Betanzos. Luisito, como adoita ser habitual, eloxia ao rival de quenda, situado no posto quince da clasificación e inmerso en plena pelexa por evitar o descenso de categoría. Ao técnico non parecen gustarlle moito as condicións nas que se disputará o encontro, co temporal en plena acción e sobre todo cun forte vento que porá as cousas moi difíciles aos protagonistas.
O preparador arlequinado asegura que o equipo chega ben preparado á cita, defende que a derrota da pasada fin de semana na Lomba é inxusta e, aínda que subliña que o obxectivo principal é sacar este partido adiante, probablemente a disputa doutro máis o domingo, que será o terceiro nunha semana, terá a súa consecuencia na repartición de minutos e a xestión de esforzos. Afirma o preparador que será hoxe cando decida a composición da convocatoria e tamén o once inicial que buscará unha vitoria que semella imprescindible para chegar con aspiracións de, polo menos, sacar adiante ese premio de consolación que será disputar as eliminatorias de ascenso.