As Revenidas cumpre quince anos cun cartel conformado por 40 artistas

Bautizado baixo o nome de Festival dás Linguas, As Revenidas é todo un referente nacional polo seu carácter popular e cultural. Unha consolidación que vén forxando nos últimos anos, pero que mostrou os seus froitos na pasada edición batendo a marca de asistencia. Unha media diaria de catro mil persoas nos concertos e máis de dous mil forasteiros acampando en Vilaxoán. Unhas cifras que se agardan superar este ano coa celebración da súa décimo quinta edición, un aniversario que reflicte a madurez dun evento «que vai profesionalizándose cada ano e xa é imprescindible nos veráns de Galicia», segundo destacou o presidente de Agadic , Jacobo Sutil, no acto de presentación celebrado onte.

As Revenidas, que se celebrarán o 17, 18 e 19 de agosto, presentan este ano un cartel potente composto por máis de corenta artistas e reforzado con decenas de actividades culturais para familias e festivaleros. Porque se algo caracteriza a este evento é a forte identidade arraigada ao pobo arousán. Como ocorre co Coral Polifónica de Vilaxóan, que se unirá á Banda Xangai nunha actuación nova que os «convertirá en protagonistas dentro dun festival de música emerxente, algo anormal que amosa o carácter do festival», sinala o membro de Xangai, Xurxo Souto. Un acto este en o que o coro se converteu na estrela e causou furor no Parque de Dona Concha. «Isto só pasa en Vilaxoán. Nas presentacións estamos todos aburridos e hoxe isto é unha festa grazas a vós» dixo o alcalde de Vilagarcía, Alberto Varela, dirixíndose aos alí presentes e ao coro, que fixo alarde do seu talento con dúas pequenas actuacións. A presidenta provincial, Carmela Silva, non dubidou en arrincarse a bailar con eles e recalcou «o orgullo por ter un festival que amosa o que somos, como amamos a cultura, o patrimonio, e as diferentes linguas». O deputado provincial e a concelleira de cultura, Xosé Leal e Sonia Outón, tamén se sumaron ao acto.

Este ano As Revenidas incorpora o sistema cashless, que inclúe un chip electrónico na pulseira para comprar no interior do recinto. Tamén se desenvolverán campañas de sensibilización de reciclaxe e outras promovidas pola Xunta e a Deputación, relacionadas coa normalización lingüística e os abusos sexuais. Por outra banda, Agadic porá en marcha unha enquisa de avaliación do impacto económico, social e comunicativo do evento.

Estas novidades sumaranse á tradicional sardiñada popular, a Gran Gala de Circo e os concertos a bordo, que completarán un cartel encabezado por Soziedad Alcoholika, O Drogas e Dakidarría, entre outros. Tamén haberá unha decena de bandas con presenza feminina «para fomentar a igualdade artística».

---

---

---