Deputados da Comisión de Defensa do Congreso coñecen en Valga o traballo de Urovesa
VALGA
Os congresistas foron guiados polo director xeral da compaña galega, Justo Sierra
13 may 2025 . Actualizado á 05:00 h.O traballo de deseño, fabricación e equipamento personalizado dos vehículos de alta mobilidade táctica (VAMTAC) que desde a súa fábrica de Valga envía Urovesa a exércitos dos cinco continentes segue espertando o interese das Administracións e representantes políticos españois. Se a finais do ano pasado era a Ministra de Defensa, Margarita Robles, a que se pasaba polas instalacións valguesas da compaña galega con sede en Santiago de Compostela, e despois das visitas institucionais do delegado do Gobierno en Galicia, Pedro Blanco, e da conselleira de Industria, María Jesús Lorenzana, o pasado venres foron deputados do Congreso pertencentes á Comisión de Defensa da Cámara Baixa os que puideron coñecer sobre o terreo o produto desenvolvido pola compaña.
Da man do seu director xeral, Justo Sierra, os deputados percorreron as distintas liñas de produción dun vehículo, o VAMTAC, amplamente usado polas Forzas Armadas Españolas e clave na súa capacidade de despregamento sobre o terreo nas súas misións internacionais. Unha visita na que puideron saber ademais de primeira man do proxecto de ampliación que Urovesa acaba de desvelar, destinado a duplicar a súa capacidade de deseño e produción.