Vimbia e gancho: o belén do barrio de Porto non para de crecer e este ano estrea ata castelo
PONTECESURES
Un grupo de veciñas está detrás dun escenario cheo de encanto
07 dic 2023 . Actualizado á 05:00 h.No barrio de Porto (Pontecesures), o Nadal comeza, desde hai anos, coa inauguración do belén que montan un grupo de veciñas, «un grupo de señoras que temos a ilusión de ver a cara de alegría dos meniños e das meniñas», segundo explica Ramona, unha delas. O pasado sábado, este equipo montou o nacemento e así se inauguraron as festas nun acto ao que acudiu a alcaldesa de Pontecesures, Maite Tocino.
O belén de Porto naceu dun concurso que hai anos organizaba o Concello. Tratábase de facer decoracións do Nadal utilizando materiais reciclados. Nesta parte do municipio, non tardou en formarse un grupo de voluntarias para participar naquela proba. E tanto lles gusto a experiencia que, cando os concursos deixaron de celebrarse, elas seguiron decorando o Nadal para as familias do lugar. Para iso, elaboran figuras de vimbio, decoradas con barbas de millo, ás que periodicamente se lles renova o vestiario. O número de figuras non para de crecer: este ano, por exemplo, incorporaron ao escenario —que se foi estendendo— un enorme castelo custodiado por un soldado. O resto de personaxes, entre os que non falta unha lavandeira ou unha pescantina, os tres Reyes Magos, viron renovado o seu vestiario. E este ano no escenario coouse, cobrando todo o protagonismo da árbore de Nadal, o gancho, que se incorporou con forza á decoración.
O resultado, confesa Ramona, «é digno de ver», e o conxunto gaña maxia cando cae a noite e acéndese a iluminación de Nadal. «É un espectáculo», conta esta veciña, máis que satisfeita polo entusiasmo que o seu traballo de todo un ano xera no público que se achega o Porto. «En canto o desmontamos xa temos que empezar a traballar nas pezas novas. Os vimbios só se poden traballar no seu tempo», argumenta Ramona. De momento, toca gozar do traballo ben feito.