O PP insta a Castaño a derrubar a pirotecnia no canto de mentir sobre a súa postura
CATOIRA
A formación advirte aos veciños de que as obras para cumprir a sentenza xudicial van para longo porque , sosteñen, o alcalde prefira lanzar falsidades sobre os edís conservadores que acometer os traballos
09 mar 2025 . Actualizado á 20:23 h.O grupo municipal do PP de Catoira lamenta profundamente a postura do goberno local con respecto á pirotecnia de Coaxe. Agora que hai unha sentenza do TSXG que confirma a súa ilegalidade e ordena a súa derriba, os populares sostén que o executivo prefire «adicarse a perder o tempo lanzando falsidades contra os nosos edís antes que cuprir co ditame xudicial».
Para o Partido Popular, o BNG sempre elixirá antes mentir sobre o PP que derrubar a pirotecnia, «porque non teñen vergoña ningunha en retorcer a realidade pola súa xenreira e impotencia electoral que teñen en toda Galicia por sufrir derrota tras derrota», asegura. É máis, sostén que «co BNG nunca se avanza porque é un partido anti, prefire destruír ao PP que construír absolutamente nada», engade. Por iso advirte de que a derriba desta empresa vai prolongar durante anos, «xa que o goberno de Xoán Castaño prefire que siga en pé para, durante todo este tempo, lanzar loiadas contra o PP».
A formación que lidera Estefanía Frieiro acusa o goberno municipal de falsear abertamente a posición do PP sobre a pirotecnia. Neste sentido, lembra que o anterior portavoz popular, Iván Caamaño, visitou a empresa non para mostrar apoio ningún, senón para comprobar que se axustaba á lei. «Dixemos que todo quedaba en mans da xustiza e os tribuanis falaron con claridade dicindo que é ilegal, polo que o Concello ten que poñerse a cumprir e non enlear», engaden os conservadores.
Para rematar, os conservadores argumentan que o Concello de Catoira tivo, nas dúas últimas décadas, dous alcaldes, o socialista Alberto García e o nacionalista Xoán Castaño, «polo que hai que ter unha caradura política supina para, sen ter dirixido a nosa terra un so día, botarnos a culpa de que se levantara unha pirotecnia e agora dicir que a apoiamos para que non se derrube nun exercicio de equlibrismo surrealista», conclúen.