A muller puido saír do coche unha vez soltouse o cinto de seguridade
17 ago 2025 . Actualizado á 20:36 h.Cambados viviu este domingo unha tarde de sobresaltos con varias incidencias que mobilizaron aos servizos de emerxencia. A máis grave produciuse no porto de Tragove, onde un turismo rematou afundido no mar despois de que a súa condutora, unha veciña da localidade identificada co iniciais D.L.V.B., perdese o control do vehículo na rampla de acceso.
Segundo testemuñas, o coche comezou a avanzar de forma repentina cara á auga cando a muller intentaba iniciar a marcha e o vehículo caeu ao mar. Varias persoas que se atopaban na zona acudiron de inmediato para auxiliala. Aínda que nun principio non lograron liberala do cinto de seguridade, a muller conseguiu soltarse e saír á superficie coa axuda dos improvisados rescatadores. Unha vez en terra, foi atendida por persoal sanitario e trasladada nunha ambulancia medicalizada do 061 ao Hospital do Salnés. No operativo tamén interviñeron a Policía Local de Cambados, o servizo de Emerxencias, Bombeiros do Salnés e persoal médico do PAC.
A tarde continuou con algún aviso máis que, afortunadamente, non revestiu a mesma gravidade. do vivido en Tragove Así, rexistrouse un conato de incendio nunha vivenda abandonada da rúa Joaquín Sánchez. As chamas afectaron unicamente a restos de aveños acumulados no interior e foron rapidamente controladas por Emerxencias de Cambados, Bombeiros do Salnés e a Policía Local.