O Céltiga incorpora ao seu proxecto o experimentado dianteiro centro Sobrido
A ILLA DE AROUSA
Procedente do filial do C.D. Lugo, chega cunha traxectoria na Tercera e na Segunda RFEF
18 jul 2025 . Actualizado á 05:00 h.A dirección deportiva do Céltiga desvelou onte o nome do oitavo reforzo para o que será o primeiro proxecto en seis anos do club da Illa de Arousa na Tercera: José Francisco Sobrido (Ribeira, 7 de abril de 1998).
Dianteiro centro, Sobrido está chamado a apuntalar a liña de ataque. Non tanto como goleador, con discretos rexistros nas seis últimas tempadas, de entre 2 e 4 goles, como pola súa veteranía e a súa habilidade para xogar de costas e cos espazos a fin de abrirlle o campo a outros compañeiros de cara a atopar o mellor camiño á portería rival.
Formado na canteira do Celta, na que rematou a súa etapa de canterano competindo na División de Honor Juvenil, Sobrido iniciou a súa carreira sénior no Compostela, continuouna no San Ignacio de Pamplona, e proseguiuna no filial do Deportivo Alavés na Segunda División B antes de volver a Galicia para enrolarse no CD Arenteiro na Segunda RFEF, no que pasou tan só unha campaña para retornar á Tercera nas filas do Gran Peña, do C.D. Estradense e, na pasada liga, do filial do C.D. Lugo, o Polvorín.
Coa contratación de Sobrido, o Céltiga ten confirmados xa 19 efectivos no seu cadro de xogadores para a vindeira tempada, practicamente a totalidade dun equipo que comezará a traballar o día 28.