O proxecto foi froito dun traballo colectivo no que se implicaron non só os estudantes, senón tamén docentes, persoal non docente e familias
24 sep 2025 . Actualizado á 05:00 h.O IES Ramón Cabanillas logrou situarse no máis alto do Festival Internacional de Cine de Bueu (FICBUEU) tras conquistar o primeiro premio na categoría de Secundaria coa curtametraxe Mariñeira. O proxecto foi froito dun traballo colectivo no que se implicaron non só os estudantes, senón tamén docentes, persoal non docente e familias, converténdose nunha experiencia de colaboración exemplar. O xurado valorou especialmente a capacidade do curto para implicar a toda a comunidade educativa ao redor dunha narración que conecta distintas xeracións, ademais de resaltar a súa calidade artística e a sensibilidade mostrada ao retratar con realismo e emoción o universo do mar e de quen vive del.
A obtención deste galardón supón unha lombeirada ao compromiso do centro coa educación audiovisual. Desde hai anos, o instituto aposta por esta linguaxe como un recurso pedagóxico que non só permite desenvolver competencias creativas, senón que tamén favorece o traballo en equipo e abre vías para a expresión cultural do alumnado.
Mariñeira nace precisamente dese enfoque: unha historia elaborada con mimo, que combina esforzo técnico cunha mirada humana cara ao mundo mariñeiro, tan presente na identidade galega. Con este recoñecemento, o IES Ramón Cabanillas reforza a súa posición como referente en innovación educativa e demostra que o cine, incluso en etapas temperás de formación, pode converterse nunha ferramenta poderosa para aprender, compartir e construír comunidade.