O recentemente ascendido que presume de ter os maiores recursos ofensivos no arranque da liga
AROUSA
Con seis tantos, o Céltiga é o equipo máis goleador da Terceira, tamén no que máis futbolistas diferentes marcaron xa
17 sep 2025 . Actualizado á 05:00 h.Tempo haberá para ver onde sitúa a competición ao Céltiga cando a sucesión das xornadas transforme as fortalezas e debilidades de cada cal en vitorias, empates e derrotas ao termo do calendario. O único certo neste momento é que, tras dúas xornadas consumidas na Terceira RFEF, o seu persoal está a empezar a cumprir co obxectivo da directiva e os socios do club insular. De volta á categoría tras seis anos penando na Preferente Autonómica, no Salvador Otero queren que o seu equipo celebre, a próxima primavera, o centenario da entidade deportiva deixando pegada sobre os terreos de xogo. E os seus seis goles en 180 minutos de xogo máis os engadidos iluminan a marca Céltiga.
A media ducia de tantos fan do conxunto que dirixe o vilanovés Luis Carro o máis goleador da liga, cun máis que o líder, Compostela. Certo é, e ao contrario que o cadro santiagués, que loce pleno de puntos empatado na táboa co Atlético Coruña Montañeros e o Alondras, o balance ofensivo non lle valeu ao Céltiga máis que para gañar un dos seus encontros. Caeu na primeira xornada 2-1, precisamente co A.C. Montañeros, regalándolles despois unha borracheira de celebracións ás bancadas do Salvador Otero o pasado sábado coa súa manita ao Somozas, 5-0. Pero é precisamente esa facilidade mostrada na súa última comparecencia en Liga a que empeza a facer soar o nome do Céltiga, en liña cos plans do club. Sobre todo, por un segundo dato.
Lonxe de ser consecuencia da tarde de graza do seu maior talento goleador, os cinco tantos ao Somozas foron obra de cinco autores diferentes: Julio Rey, Óscar Iglesias, Marcos Blanco, Sobrido e Guille. Unha semana antes, fora Adri Rodríguez quen adiantara ao Céltiga ante o Montañeros, sen premio final. Media ducia de goleadores, a metade dos efectivos enrolados no centro do campo e a liña de ataque no vestiario do conxunto da Illa. Sen dúbida, nota obrigada nos cadernos de anotacións dos observadores rivais.
Na mesma liña, os cinco goles acumulados polo Compostela foron obra doutros tantos futbolistas diferentes, como os catro dun Arousa chamado a pelexar co equipo santiagués o título e o ascenso directo.