Unha decena de familias seguen sen poder regresar a casa tras o incendio dunha fábrica de fitosanitarios en Vilagarcía
AROUSA
No recinto de Impex Europa seguen os traballos de arrefriado da nave, que colapsou onte tarde
10 ago 2025 . Actualizado á 14:17 h.Vinte e catro horas despois do inicio do incendio que onte arrasou a nave almacén de Impex Europa, a empresa que fabrica o Ratibrom, os traballos continúan en Rubiáns (Vilagarcía). No recinto da fábrica traballa un equipo de sete persoas que teñen como misión manter baixo control unha área que segue sendo moi inestable.
Nestes momentos, explicaba o sarxento dos Bombeiros do Salnés, David Padín, os traballos que conduzan á extinción total do lume deben realizarse atendendo a dúas prioridades: evitar a contaminación ambiental por augas e manter baixo control a nube de fume tóxico.
«O fume de calquera incendio é tóxico», aclarou David Padín, que lembrou que neste caso, ademais, arderan produtos fitosanitarios. Iso provocou que, de momento, os residentes nunha decena de casas próximas sigan sen poder volver ás súas vivendas, segundo confirmou o Concello de Vilagarcía. Outros veciños que foran desaloxados onte si puideron retornar aos seus fogares, aínda que adoptando unha serie de medidas de prevención.