Silvia Gago, Raúl Fernández e Pedro Torrado dobrarán barco en Pitesti (Romanía)
02 jul 2025 . Actualizado á 05:00 h.A selección española de piragüismo esprint júnior e sub-23 encara esta semana a primeira das dúas grandes citas de cada tempada: o Campionato de Europa. E como é tradición, faino cunha nutrida participación de padexeiros arousáns. Para ser precisos, de canoístas, sendo a modalidade da pa dunha única folla a gran dominante na comarca desde case o principio dos tempos.
Dúas padexeiras do Náutico O Muíño de Ribadumia, Silvia Gago García e Lara Remigio Besada, e tres deportistas do Club Piragüismo As Torres-Romaría Vikinga de Catoira, Raúl Fernández Busto, Pedro Torrado Mollinedo e Marta Castiñeiras Castro, son a representación arousá nas augas da localidade romanesa de Pitesti. Dous deles, dobrando proba.
Coa competición comezando mañá xoves, Silvia Gago pelexará por brillar na súa estrea internacional tanto no C1 500 como no C2 500, este último, barco do programa olímpico, no que forma parella coa súa compañeira de club, Lara Remigio. Ambas as dúas, júniores.
Na mesma categoría compite Marta Castiñeiras no C2 200, no seu caso formando tándem con Aitana Montilla, do CDB Piragua Madrid, e o tamén padexeiro das Torres-Romaría Vikinga Raúl Fernández, no seu caso no C1 500 e no C2 500 con Antón Lagares, do Club Ría de Betanzos.
Tamén dobrará, na categoría sub-23, Pedro Torrado. E faráo nas dúas canoas do programa olímpico: a C1 1.000 e a C2 500, nesta última, co pontevedrés Martín Jácome de compañeiro.