Media ducia de padexeiros arousáns clasifícanse para o Campionato de Europa de Maratón
AROUSA
Tono Campos, Iván Alonso e Candela Romero dobrarán barco na cita continental
30 abr 2025 . Actualizado á 05:00 h.Arousa volverá optar un ano máis a coprotagonizar o panorama internacional do piragüismo de fondo. Seis padexeiros do sur da ría despediron a semana pasada con praza na selección española que o vindeiro mes disputará o Campionato de Europa de Maratón na localidade portuguesa de Ponte da Lima. Unha cifra que a bo seguro tería sido maior de non se ter que suspender o domingo a xornada dos caiacs e das canoas dobres da categoría sénior cando xa comezaran as regatas, por mor do forte vento reinante, que mesmo envorcou a metade das piraguas na auga da localidade catalana de Banyoles no segundo e último día do Campionato de España de Maratón, a proba elixida pola RFEP para a escolla dos seus paladíns na cinta continental.
O sábado, no programa individual, seis padexeiros arousáns conseguiron o premio da internacionalidade rematando entre os dous mellores nas categorías sénior e sub-23, e, no caso da canoísta do Náutico Pontecesures Candela Romero, impoñéndose na final do C1 júnior, categoría na que España acudirá ao Europeo só cun deportista. Sara Vila, compañeira de club de Romero, foi bronce na mesma proba do Campionato de España.
Tamén gañaron o título nacional e cadansúa prazas para Ponte da Lima o caiaquista do Club Piragüismo As Torres-Romaría Vikinga Iván Alonso Lage, no K1 Sénior, e o grovense do Breogán Tono Campos, no C1 Sénior. Os dous, como Candela Romero, dobrarán o vindeiro mes en augas portuguesas logo de gañar os selectivos específicos das súas embarcacións séniores na distancia curta realizados na véspera do Campionato de España.
Os compañeiros de Alonso nas Torres-Romaría Vikinga Fernando Busto e Izan Aliaga acudirán ao Europeo como subcampións de España do C1 Sénior e do K1 Sub 23, respectivamente, e a grovense do Breogán Tania Álvarez fará o propio tras facerse coa prata no K1 Muller Sénior. Queda pendente de saber como resolverá a RFEP a selección dos C2 e dos K2, con a lo menos tres parellas do sur da ría aspirando ás prazas continentais.