Dimite o director nacional de Kenpo tras decidir privar aos séniores, entre eles Pedro Muñoz, de ir ao Mundial
AROUSA
O kenpoca vilagarcián pedira a saída do mandatario nun vídeo nas súas redes sociais
14 mar 2024 . Actualizado á 05:00 h.O mundo do Kenpo español vive as que parecen ser as horas máis convulsas da súa historia. O presidente da Real Federación Española de Karate, Antonio Moreno, aceptou onte a dimisión que lle presentaba o director do departamento nacional de Kenpo, José María Méndez. Tras iso, o profundo descontento de moitos deportistas internacionais, clubs e federacións autonómicas pola decisión de Méndez de prescindir dos kenpocas séniores no Mundial que nun mes disputarase en Turquía.
Entre os encabuxados, o martes sobresaíu a figura do vilagarcián Pedro Muñoz. Internacional desde o 2017, varias veces campión do mundo e elixido no 2023 mellor kenpoca do Mundial, Muñoz colgou un vídeo nas súas contas en redes sociais no que cargou con suma dureza contra o desde onte ex director nacional. Muñoz criticou a decisión de Méndez de prescindir dos deportistas séniores, «núcleo duro que leva indo desde o 2017 aos Campionatos do Mundo e conseguindo os últimos logros de España, como o título mundial en tradicional».
O vilagarcián afeou o trato do ex director nacional aos deportistas e clubs e, tras esixir respecto, fixo o propio coa dimisión de Méndez e todo o seu equipo.
Dita dimisión produciuse só un día despois de que este último destituíse ao seleccionador español, Vicente Ardines. Desde a Federación Galega de Karate destacábase onte a rapidez coa que o presidente da Española tomou cartas no asunto, asumindo a xestión dunha crise larvada desde hai meses e que se intentou solucionar antes cunha reunión en xaneiro cos responsables autonómicos de kenpo e o nacional.